Grupo di docente na EPI a bay den accion

ORANJESTAD - Un grupo di 24 docente di EPI Ciencia y Tecnologia a drenta den accion awe mainta pa motibo di pago di overtime y incumplimento di promesa. Tanten cu no tin un solucion pa e problema, e accion lo a continua. Esey kier men cu lo no ta dunando les por lo pronto eynan. Mientrastanto e alumnonan a presenta na scol y a keda sorprendi cu e accion.

E ACCION

E accion di awe mainta di un grupo di docente di EPI sector Ciencia y Tecnologia ta debi cu nan no ta hayando nan overtime (overuren) paga. Luna pasa (22 di januari 2021) nan a manda un carta pa varios instancia, incluyendo directie y gobierno, informando nan di nan preocupacion. Ainda nan no a haya nan overtime paga di aña pasa. Como tal manda e carta cu dos condicion, entre nan cu ta haya garantia cu ta paga e overtime traha di aña pasa, y tambe un garantia cu si nan traha overtime e aña aki, nan ta haya esaki paga. Ademas, nan ta bisa cu si esey no por, nan lo traha e orarionan regular cu nan ta traha, esta e asina yama ‘jaargemiddelde’ di 32 ora pa siman so.