Corte: DAO mester ricibi peticion di retiro pa grupo di trahado di Romar Trading

Corte: DAO mester ricibi peticion di retiro pa grupo di trahado di Romar Trading

Posted on 02/3/2021 5:47 pm AST | Updated on 02/3/2021 5:50 pm AST

ORANJESTAD – Directie Onderzoek en Arbeid (DAO) tin dos dia pa acepta e peticion di retiro di e compania Romar Trading contra di un grupo di trahado di e compania, sino e por haya un multa di 5 mil florin pa dia of parti di dia cu e no cumpli cu e peticion. Asina huez a dicta den un caso cu Romar Trading a cuminsa recientemente.  

E CASO

Romar Trading a inicia e caso pasobra DAO a dicidi riba orden di minister di Labor Glenbert Croes ( Romar a presenta prueba di esaki den corte), pa no tuma ningun peticion di retiro di trahado, cu ta un decision cu a bin di e minister, for di comienso di e pandemia aña pasa. E mandatario kier a evita cu companianan ta cuminsa retira trahado sin mas, usando e pandemia como excusa. Pero, den corte Romar a presenta su caso, indicando cu pa motibo di problemanan economico di ultimo aña y cu e pandemia a empeora e situacion, mester retira un grupo di trahado. A haya solucion pa un grupo pero ta keda un grupo cu mester wordo retira. Pero DAO no ta tuma e peticion di retiro. Y den un sentencia anterior, a mustra cu huez no ta e persona indica pa haci esaki sino den momento extremo urgente. Asina mes, huez a mustra DAO cu door di e hecho aki, e ta kita e derecho fundamental di Romar Trading pa haci peticion pa e retiro di su trahadornan. Ademas, e derecho pa nenga esaki, no ta un autoridad cu e minister tin, sino esun cu ta responsabel pa traha ley, esta Parlamento. Pues, DAO no por sconde tras di e decision di minister, y viola asina e derecho basico di un ciudadano of persona segun nos constitucion pa pidi pa wordo scucha den e caso aki pa retira persona. Mirando e seriedad di e situacion aki, huez a dicta na fabor di Romar Trading, ordenando DAO pa acepta e peticon y pa trata esaki conforme e periodo stipula pa ley di 12 siman pa dicidi si ta otorga e retiro of no. E caso aki ta instrumental pa otro companianan cu den pasado tambe a haci peticion pa retiro, pero cu no a wordo atendi, netamente pa motibo di e decision di e minister en cuestion. Por lesa e sentencia AKI

  • Corte a aproba pa scucha testigo pa ex minister den apelacion di Ibis

    Corte a aproba pa scucha testigo pa ex minister den apelacion di Ibis

    ORANJESTAD – E tres hueznan di corte superior cu tin cu trata e caso di apelacion conoci como Ibis a bay di acuerdo e siman aki cu e varios peticion di abogadonan di e sospechoso principal, ex minister Paul Croes. Mayoria di nan ta trata pa scucha testigonan. Den e caso aki ta trata di e director di Dimas, director di KIA y un trahado di KIA. Esakinan ta importante segun abogadonan di e ex mandatario, esta mr Peppie Sulvaran y Demis Illis, pa por tin un miho bista di e caso. Tur esaki a tuma lugar den e asina yama ‘regie zitting’ cu a keda trata inicialmente na januari di e aña aki. Manera anteriormente informa, huez a pone e fecha di 23 di februari (ayera) pa dicidi riba esey. Y ta aki ta unda cu hueznan a dicidi cu ta duna permiso pa scucha e testigonan aki. No ta conoci si lo scucha nan prome cu e caso tuma lugar na September, pa despues usa nan testimonio, of ta pidi nan testimonio durante e caso mes. E caso a keda presenta ayera via video conference. 

  • Aruba Bank a apela sentencia den caso cuenta bancario di Bochincha Container Yard

    Aruba Bank a apela sentencia den caso cuenta bancario di Bochincha Container Yard

    ORANJESTAD – E instituto financiero Aruba Bank a apela e sentencia reciente contra dje pa e caso di habrimento di cuenta bancario pa e negoshi Bochincha Container Yard (BCY) di comerciante y ex politico Otmar Oduber. Asina e portal Antiliaans Dagblad ta raporta diabierna den su edicion. Recientemente huez a dicta cu e banco mester habri un cuenta bancario comercial pa e negoshi menciona, y mester haci esaki dentro di 24 ora cu e sentencia ta presenta. Esaki, no obstante cu e propietario esta sr Oduber ta un sospechoso den un caso penal riba fraude y corupcion. E status di Oduber no por ta un motibo pa cual e banco ta nenga di habri e cuenta. 

  • A confisca 22 mil dollar di Mexicanonan cu a yega Aruba cu avion priva

    A confisca 22 mil dollar di Mexicanonan cu a yega Aruba cu avion priva

    ORANJESTAD - Riba 13 februari ultimo Aduana a controla tres pasahero na aeropuerto internacional Reina Beatrix, kendenan a yega Aruba cu un avion priva desde Mexico. Nan tabatin un total di 22.000 dollar cu nan. E sospecho ta cu nan a parti e cen aki entre nan pa keda bao di e limite di mester meld. E pasaheronan a duna declaracionnan contradictorio y no por a splica e provenencia di e placa. Nan a wordo entrega na polis y despues di interogacion, a tuma distancia di e placa. E caso penal a keda termina y e sospechosonan lo no wordo persigui mas. 

  • Corte ta limita trabou debi cu algun trahado a test positivo pa Covid 19

    Corte ta limita trabou debi cu algun trahado a test positivo pa Covid 19

    ORANJESTAD - Algun di e personal di Corte di Husticia a test positivo pa Covid19 cu a pone cu Corte mester a bay den un asina yama ocupacion minimo di personal. Esaki pa evita cu e operacion completo di Corte di Husticia ta den peliger. No a bisa si cuanto trahador a test positivo. 

  • Ex director Davelaar a perde su caso contra Serlimar

    Ex director Davelaar a perde su caso contra Serlimar

    ORANJESTAD – Ex director di Serlimar Henley Davelaar a perde su caso contra Serlimar Sui Generis. Esaki kier men cu Davelaar no ta haya e suma di 780.450 florin cu el a pidi pa Serlimar pag’e como ‘recompensa’. Ademas Corte no a bay di acuerdo cu ponencia di Davelaar cu Serlimar a actua incorecto contra Davelaar pa cu su retiro na februari di aña pasa. 

  • Corte a obliga banco pa habri cuenta pa Bochincha Container Yard

    Corte a obliga banco pa habri cuenta pa Bochincha Container Yard

    ORANJESTAD – Corte a ordena e instituto financiero Aruba Bank pa dentro di 24 ora cu e sentencia keda presenta, e habri un cuenta bancario comercial local cu e compania Bochincha Container Yard di e commerciante y ex minister Otmar Oduber. Incumplimento di esaki por nifica un multa diario pa Aruba Bank di 2.500 mil florin pa dia. Y si dado caso e propietario (Oduber) keda sentencia den un caso pa cual e ta wordo sospecha di dje (Flamingo), e ora e banco tin dos luna pa desolve e relacion di trabou cu e compania BCY. Pero mientrastanto e banco tin cu cumpli. 

  • Powered by SETAR