Corte a obliga banco pa habri cuenta pa Bochincha Container Yard

ORANJESTAD – Corte a ordena e instituto financiero Aruba Bank pa dentro di 24 ora cu e sentencia keda presenta, e habri un cuenta bancario comercial local cu e compania Bochincha Container Yard di e commerciante y ex minister Otmar Oduber. Incumplimento di esaki por nifica un multa diario pa Aruba Bank di 2.500 mil florin pa dia. Y si dado caso e propietario (Oduber) keda sentencia den un caso pa cual e ta wordo sospecha di dje (Flamingo), e ora e banco tin dos luna pa desolve e relacion di trabou cu e compania BCY. Pero mientrastanto e banco tin cu cumpli. 

E CASO

Sr Oduber a cuminsa e caso contra e instituto financiero, despues cu e ultimo aki a informe den un carta cu no por habri un cuenta bancario comercial local p’e debi cu e propietario ta un sospechoso den un caso penal pa e.o. fraude y cu esaki por trece publicidad negativo pa e instituto financiero. Resumiendo e proceso, Corte ta di opinion cu contrario na pensamento di e banco, Oduber por bien ta un sospechoso, pero ainda no a keda sentencia. Y nos ta biba den un estado di derecho unda cu tur hende ta inocente te ora cu e wordo haya culpable oficialmente. Y esey no ta e caso. Ademas, e argumento cu e banco ta usa pa nenga di habri cuenta, esta cu e.o. e tin regla di sigui di Banco Central, no ta suficiente motibo. De hecho, mientras cu enberdad tin regla estricto, ta keda na e banco si e ta permiti pa habri un cuenta bancario cu e cliente. E puntonan cu e banco a usa, no ta suficiente convincente pa hustifica pa nenga di habri e cuenta. A bisa cu si dado caso cu sr Oduber wordo haya culpable y sentencia, e ora e banco ta haya 2 luna pa termina e relacion di trabou cu e compania y e cliente. No prome. Por lesa e sentencia complete di 9 pagina AKI.