Encuesta: Finanzas ta e tema mas importante pa eleccion na September

ORANJESTAD – Segun e ultimo encuesta cu noticiacla a tene recientemente, mayoria cu a participa ta considera e tema di finanzas publico (22%) como e tema mas importante pa e proximo Eleccion Parlamentario di Aruba. E eleccion  ta tuma lugar na September di e aña aki. Ta sigui e pandemia /Covid19 (19%), y e ultimo cos ( di e temanan ofreci) tabata refineria (8%). Un total di riba 700 persona a participa y e edad cu mas a participa tabata entre 45-54 aña di edad. 

E TEMANAN

E otro temanan cu e encuesta a sugeri, fuera di esnan ya anuncia ariba, tabata Criminalidad (14%), Reforma/COHO (15%), Medio Ambiente(9%) (dump p.e.), (Problemanan Social (14%). Tambe tabatin e opcion ‘otro’, unda cu mayoria a opta pa Enseñansa. Pero aki lo bin un otro raportahe pa atende cu e punto ey. Esaki pasobra tin mas informacion acerca cu ta di interes, esta kico otro hendenan ta sugeri fuera di e puntonan sugeri. 

\

DISTRICTO

Manera nos ta haci semper, tin e parti di edad y districto pa sa e patronchi aki di e encuesta riba e respectivo tema. Loke a hala atencion ta cu esnan den districto Sta Cruz y San Nicolas tabatin mas interes pa finanza (23%) mientras cu di otro banda,-pa straño cu por zona pa algun-, e districto cu menos tabata interes den refineria, tabata San Nicolas (13%). Oranjestad y San Nicolas tabatin interes halto den COHO (15%), mientras cu Santa Cruz tabata e districto mas interesa den Salud/Covid19 (20%). Medio ambiente tur districto tabata casi igual (varia entre 8 y 9%).  Y esun mas interesa den e tema di criminalidad ta Savaneta (16%). 

EDAD

Pa loke ta edad, e grupo mas interesa den Finanzas tabata di esnan hoben esta entre 18 y 24 aña (24%) y esnan menos interesa tabata di edad mas avansa (55 y mas halto) cu ta 20%. Esnan di edad hoben tambe (25-34 aña) tabata preocupa cu e parti social (17%), y aki tambe esnan di edad mas avansa (65 y mas halto) tabata menos interesa esta 11%. Esnan di edad di 35 aña pa 44 tabata mas interesa den COHO (15%) mientras cu esnan di edad mas avansa, esta di 65 y mas halto tabatin mas interes esta 24%. Algo cu por ta comprendibel. E parti di criminalidad ta e tema pa esnan di edad hoben cu ta 16%.