Aruba y Hulanda a firma agenda di ehecucion di landspakket awe

ORANJESTAD – Awe Aruba y Hulanda a firma e asina yama agenda di ehecucion di e landspakket pa e reforma COHO. Ta un agenda cu Hulanda y Aruba a formula conhunto pa ehecucion.  Den e ‘Landspakket’ aki a incorpora entre otro medida dirigi riba fortifica e estado di derecho y mehora e maneho financiero, sistema di impuesto, cuido y enseñansa. E meta ta aporta na un Aruba resiliente y exitoso. 

E AREGLO MES

Por corda con riba 13 di november 2020 Hulanda y Aruba finalmente despues di basta negosacion, a firma e areglo mutuo pa ehecucion di e ‘Landspakket’. Durante e ultimo simannan a traha den cooperacion estrecho y a haci palabracion riba e prome pasonan cu Aruba, pa gran parti sosteni door di Hulanda, lo tuma. E pasonan aki ta haya nan repercucion den e prome agenda di ehecucion. Di e forma aki ta haci investigacion comparativo di e condicionnan di trabou den sector publico y semi-publico y ta enfoka riba maneho financiero. Tanto Aruba como Hulanda a compromete nan mes pa tuma e pasonan palabra. 

E AGENDA

E agenda di ehecucion ta un documento cu lo wordo refina continuamente. Esaki lo tuma luga den prome instancia cada cuartal y lo ta alinea cu decision di Conseho di Ministro di Reino tocante e tramonan adicional di e sosten di likides.  Segun e prome mandatario di Aruba, e secretario di estado Knops ta contento cu pa medio di e agenda di ehecucion aki ta duna contenido na e restructuracionnan necesario. “Despues di firmamento di e areglo aki mi a indica cu ta awo e trabou mes ta bay cuminsa. E agenda di ehecucion aki ta yuda nos den esaki y di e manera aki ta forma un guía cu fecha fiho.”  Minister-president Wever-Croes: “Den tempo difícil palabracion concreto ta importante. Esaki a wordo haci den e Agenda di Ehecucion. Mi ta kere den Aruba. Ta tempo dificil pero kibra nos lo no kibra. Nos ta wak futuro. Nos ta mira nos dilanti. Hunto nos ta para fuerte”