Wever: Pa diahuebs lo dicidi si mester ahusta medidanan di Covid19

ORANJESTAD – Mientras cu awe mainta prome minister Evelyn Wever Croes a specifica cu e medidanan contra Covid19 cu mester a vence diadomingo (ayera), a keda prolonga pa un siman completo, esaki por cambia ainda. Segun e mandatario, ta wardando e resultado di e testnan cu a manda pa Hulanda, pa determina si tin mas caso positivo di e variante di Inglatera. Si esey resulta e caso, lo tin cu aumenta medida, aunke no tin hopi cos mas cu por haci. Entre e medidanan cu e mandatario a pensa, ta limita cantidad di persona cu ta topa cierto caminda y mantene e medidanan cu ta imponi aworaki, manera Toque de Queda. Segun e mandatario, mientras cu e resultado di e testnan ta drenta awe dialuna, ta determina pa diahuebs anuncia cualkier cambio di eventual medida. Mientrastanto, e medidanan actual ta keda vigente, manera Toque de Queda di 11’or di anochi pa 5’or di mainta y orario di cierre pa 10’or di anochi .