Wever: Diaranson lo sinta cu gremionan manera a palabra

ORANJESTAD – E siman aki, diaranson pa ta exacto, gobierno lo combersa cu e gremionan comercial manera ATIA, KvK y AHATA, riba e tema di reforma y mas specifico e avasenan di COHO. Asina prome minister Evelyn Wever a bisa dialuna durante un conferencia di prensa di gobierno. Cu esaki e ta spera di kita e preocupacion cu e tres gremionan aki tin pa cu e situacion reinante. Manera cu e portal aki a raporta caba, nan a manda un carta pa gobierno, reclamando cu no tin progreso riba e tema y si tin progreso, nan no ta wordo informa. 

KICO POR

Segun e prome minister awe mainta, e conoce e preocupacion di e gremionan y ta sinti nan dolor. Ademas e puntonan cu nan tin manera e red tape y tambe e adaptacion di ley laboral tambe e tin oido pe, pero ta bezig cu esaki aworaki. Problema ta cu na final di cuenta, ta Hulanda ta esun cu ta dicidi. Riba pregunta di noticiacla, e prome mandatario a bisa cu e no tin problema pa scucha e gremionan en cuestion, y nan tin bon idea. Pero si nan kier forma parti di e negosacionan cu Hulanda, esey si no por. Si nan kier haci esey, nan tin cu forma un partido politico, bay eleccion y saca asiento pa por goberna. Cu otro palabra, tin limite cu loke e gremionan kier y por. Di otro banda, ta admiti cu gremionan tin bon idea y ta bon pa tende esakinan semper. Esey lo no cambia segun e prome mandatario. Cu e gremionan tin pura, e mandatario ta compronde y si ta p’e, cosnan lo tabata cla masha tempo caba.