Total di 15 partido ta participa na Eleccion Parlamentario na Corsou

WILLEMSTAD – Ex director di Giro Bank Eric Garcia (81) na Corsou tin cu bay prison bek. Asina Corte di apelacion a dicta diahuebs. E sentencia ta keda 4 aña di prizon pa malversacion, falsificacion di firma, labamento di placa. Ademas e tin cu paga 19 miyon florin bek of haya un castigo adicional di 3 aña di prison. Segun e cargonan, sr Garcia a malusa su posicion como curator di e faillisement di Banco de Maracaibo entre 2010 y 2016. Asina el a traspasa e suma di 11 miyon dollar riba otro cuentanan propio. Corte a tene cuenta cu e edad di sr Garcia, y cu e tin problema cu salud. Sinembargo esaki no ta impede cu e por sinta su castigo den prizon envez di aresto di domicilio manera tabata e caso te awor. Pero a opta pa reduci e castigo di prison di 5 aña pa 4. Sr Garcia y ministerio publico tin 14 dia pa apela e caso den corte di casacion. 

MIAMI - The Centers for Disease Control and Prevention (CDC) a añadi Antigua, Barbuda y Corsou e siman aki riba e lista di riesgo halto pa Covid19, y cu biaheronan Mericano tin cu evita. E nivel ta 4 cu ta ‘hopi halto’. E raportahe ta bisa cu islanan manera St Lucia y Aruba ta riba e lista caba (Aruba for di 2 di februari ultimo). Sinembargo, informacion for di Consulado Mericano na Corsou lo a indica cu e informacion aki no ta completemente corecto ya cu pa algun luna caba Corsou ta riba e lista. Sinembargo e lista ta bisa claramente cu ta for di 1 di maart, a ‘update’ e lista aki. Fuera di Aruba y Corsou, tin mas di 150 pais cu Merca a label como risico grandi, incluyendo Merca mes. 

WILLEMSTAD – Miembro di partido politico PAR Emmilou Capriles a keda huramenta como miembro di Parlamento di Corsou diahuebs atardi pa gobernadora interion Michelle Russel-Capriles. Asina e portal Paradise FM ta raporta. Cu e huramentacion aki, e impase parlamentario ta yega na su fin. Awe mainta gobernadora a pidi e conseho electal pa prepara e documentacion pa por huramente sra Capriles. Cu esaki sra Capriles lo fungi como Parlamentario pa e proximo dos luna y mei cu ta keda e Parlamento aki. Potret cortesia Paradise FM. 

WILLEMSTAD – Na Corsou huez comisario a prolonga detencion di 4 di e 5 agentenan policial cu ta deteni for di diadomingo ultimo. Na prome instante a raporta cu tabata trata di 6 polis, pero a resulta despues cu ta 5. Nan ta deteni relaciona cu iregularidadnan cu nan tabata envolvi aden. Ta trata di 3 homber polis y un polis muher. A separa nan di otro pa evita cu nan ta papia cu otro obviamente.   

WILLEMSTAD – Na Corsou den fin di siman (diadomingo mainta) un grupo di 6 polis a keda deteni relaciona cu un investigacion andando di ‘faltamento cu procedimento di confiscacion di propiedad y kibramento cu privacidad di vivienda. Tabata dia 13 di januari ultimo ora cu e 6 polisnan aki a keda suspendi di nan trabou, y mester a keda cas. E weekend aki nan a haya nan mes dilanti un fiscal auxiliar y despues a ordena nan encarcelamento pendiente di mas investigacion. Potret cortesia notisia.com

WILLEMSTAD /DEN HAAG – Gobierno di Reino Hulandes diabierna a impone un medida di alta supervision (Algemene Maatregel van Rijks Bestuur) pa gobernador (lesa:Corsou) debi cu 10 parlamentario tabata desobediente y a frena e operacion di esaki pa dos luna. Awe mainta presidente di Parlamento di Corsou Ana Maria Pauletta a confirma e informacion aki durante e programa radial cu periodista Mariano Heyden, indicando cu e ta un berguensa cu esaki mester sosode aworaki, siendo cu tin yen di cos importante sosodiendo.