Canada a para tur buelo pa Caribe incluyendo Aruba

TORONTO (AP) — Prome minister Canades Justin Trudeau a anuncia cancelacion di tur buelo di Canada pa Mexico y Caribe incluyendo Aruba te 30 di april proximo. E motibo ta e aumento di medida contra Covid19, particularmente contra e variantenan nobo cu ta surgiendo. Ademas turistanan cu ta bolbiendo Canada, mester pasa un test obligatorio PCR ora cu nan yega Canada bek, y mientrastanto warda nan resultado durante tres dia den hotelnan apunta, cu por sali nan 2000 dollar extra. Aruba ta ricibi buelo di dos aeroliña, West Jet cu apenas e luna aki a reanuda su buelonan despues di a para nan aña pasa durante e lockdown. Nan tin un buelo pa siman for di Toronto pa Aruba. Tin tambe Air Canada cu tin buelo pa Aruba. For di CEO di ATA, Ronella Croes, e portal a compronde cu anticipando e paso aki, WestJet a informa Aruba caba na comienso cu lo para nan buelo fin di e luna aki.