Minister President na SEPPA: Mester dialoga cu director di DIP

ORANJESTAD – Den un prome reaccion di prome minister Evelyn Wever-Croes riba e accion di trahadonan di DIP awe mainta, e ta bisa di ta lamenta e inkietudnan cu tin na pia di trabou den e Departamento DIP y a conseha sindicatonan pa busca e dialogo na mesa. E situacion cu a wordo describi den un carta cu Minister President a ricibi siman pasa di un grupo di empleado, ta indica cu e relacion di trabou ta bou di presion y esaki ta hustamente na mesa mester yega na solucion. 

OTRO BANDA DI MEDAYA

Segun e mandatario, mesora el a pidi Director di DIP pa su banda di medaya. Y basa riba esaki Minister President a informa sindicato SEPPA ta na mesa cu director nan mester cuminsa. 

Tambe Minister President a informa SEPPA cu debi na e pandemia y tur e retonan cu e pandemia ta trece cu ne, su agenda no ta permiti pa sinta awor cu e empleadonan pero a ofrece, si sindicato no logra sali afo cu e director, cu Minister President lo institui un comision pa atende e problema y ya caba Minister President a pidi Director di Departamento di Recurso Humano y Director di Bureau Integriteit Aruba, pa papia cu esnan envolvi pa purba yega na un solucion y un conseho pa e Minister. 

SOLUCION

Minister President a pidi tur partido envolvi pa na forma sensato purba yega na un solucion.