MP: Tardansa pa apela Ibis debi na Covid19 y peticion di ex mandatario mes

ORANJESTAD – E hecho cu a tarda asina hopi pa trata e caso di apelacion Ibis, segun un comunicado di Ministerio Publico (MP) diahuebs, ta cu a pospone esaki algun biaha debi particularmente na e situacion cu Covid-19 y riba peticion propio di di defensa di e ex mandatario envolvi Paul Croes. Esaki pasobra e caso mes a wordo treci den apelacion na fin di aña 2019. Ministerio publico ta confirma tambe cu e tratamento lo tuma lugar na september 2021. “ Asina Corte Superior a determina” e comunicado ta sigui bisa.

E REGIE ZITTING

Manera cu e portal aki a raporta anteriormente caba, ayera merdia a tuma lugar easina yama regiezitting den apelacion di e casonan penal contra ex-minister di Labor Paul Croes, su casa Melony y cuatro otro sospechoso. E ex-minister a wordo condena den prome instancia na februari 2019 pa un castigo di cuatro aña pa corupcion, labamento di placa, maluso di funcion, dunamento ilegal di trabao y participacion na un organizacion criminal. E caso aki, conoci como Ibis, a start na maart 2017 cu diestres huiszoeking. 

PETICION 

Den e regiezitting di ayera defensa a trece su deseonan pa dilanti pa loke ta e investigacion (onderzoekwensen). Corte Superior lo dicidi riba 23 di februari venidero tocante e onderzoekwensen aki. Una vez e deseonan di defensa pa e investigacion wordo ehecuta, lo trata e caso den su contenido. E tratamento lo tuma lugar na september 2021, asina Corte Superior a determina ayera.