Na September corte kier trata apelacion di caso Ibis

ORANJESTAD – E caso di apelacion di Ibis cu ta trata e.o. ex minister Paul Croes, por wordo trata mitar di September di e aña aki. Asina Corte a indica durante e asina yama ‘regiezitting’ cu a tuma lugar diaranson merdia den corte di Aruba. E caso di apelacion lo trata fuera di ex minister Croes, su sra Melony y 4 otro sospechoso. E fecha exacto lo keda determina dia 23 di februari proximo ora cu Corte determina tambe kico tur e lo permiti a base di e peticionan haci pa e abogadonan en cuestion. Asina abogado pa sra Croes, mr Demis Illis a bisa noticiacla.

CAMBIO DI ABOGADO

Segun Illis, tabata e ex mandatario cu a determina cu ta bon pa den caso di apelacion, cambia e strategia. “Y cu esey a pas pa trece Peppie (Sulvaran)” Illis a bisa. Mescos cu e abogado anterior mr Marije Vaders, Peppie Sulvaran ta bin di Corsou di e bufete Sulvaran y Peterson, y lo asesora e ex mandatario, mientras cu sr Illis lo defende su señora, Melony Paesch. E caso mes (regie zitting) no a dura largo y a keda palabra cu partidonan lo bin hunto pa tende kico tur hueznan lo permiti pa tuma lugar y kico e abogadonan por haya. Entre otro a pidi pa scucha cierto persona como testigo, y esaki hueznan tin cu dicidi si ta permiti of no. 

E CASO

Na februari ta haci 2 aña pasa cu e ex mandatario y su casa a keda sentencia unda cu e ex mandatario a haya 4 aña di castigo di prison y 10 aña prohibicion pa participa den politica, debi na su actonan cu a wordo considera fraude y corupcion y abuso di poder como gobernante. Su casa tambe a haya sentencia cu ta trabou pa comunidad.