E variante di Inglatera di Covid19 ta sigui presente na Aruba

ORANJESTAD – Mientras cu e 5 personanan cu tabata contagia cu e variante di Covid19, a recupera caba, e variante ta na Aruba, e ta presente y porta cu tin mas hende cu tine. Asina e vocero di DVG Jurette Croes a bisa e portal Mas Noticia diamars atardi den un entrevista. Segun Croes, e pensamento cu pasobra e 5 persona cu a keda anuncia diadomingo di tabata contagia mientrastanto a cura, no kier men cu e variante no ta na Aruba mas. Esey a crea un confusion segun e vocero diamars. Esaki pasobra a compronde e situacion robez. Dialuna anochi gobierno a informa di e presencia di e variante di e virus na Aruba, cu a causa poco consternacion. Despues diamars a bin e informacion cu mientrastanto e 5 personanan infecta, a cura caba. Segun Croes, ta dura un siman pa Aruba haya resultado di testnan cu ta bay Hulanda pa check pa e variante. Y pa ora cu e resultadonan bolbe Aruba, esaki por nifica cu e personanan infecta, ya ta cura caba.