Wever: Lo impone medida adicional contra Covid19 e siman aki

ORANJESTAD – Gobierno di Aruba lo impone medida adicional (contra Covid19) cu lo keda conoci den e siguiente dianan. Asina minister presidente Evelyn Wever Croes a bisa noticiacla diamars mainta relaciona cu e noticia cu e variante Britanico di Covid19 a yega Aruba caba y a keda anuncia dialuna anochi. E mandatario a bisa si alavez cu Aruba tin medidanan hopi halto caba “in place”. “Nos lo mantene nan”, e mandatario a bisa riba e punto aki, unda cu por compronde y no ta descarta cu esaki kier men cu e medidanan actual cu mester a vence diadomingo awor, posiblemente lo keda prolonga.

DECISION DI CORSOU

Pa loke ta e decision di Corsou pa tur biahero cu bin di Aruba, haci un PCR test awor, prome minister di Aruba Evelyn Wever ta considera un decision logico. Pues ta algo cu un pais lo a haci, pa proteha su mes. Por corda cu Aruba a haci mescos ora cu e situacion tabata alarmante aña pasa na Corsou dado momento cu cifranan di Covid19 a aumenta drasticamente. 

E VARIANTE

Manera e portal aki a raporta ayera nochi caba, autoridadnan di Aruba a ricibi resultado di testnan cu a wordo manda Hulanda y esakinan a confirma cu 5 di e casonan di Covid tin e variante di Inglatera. Asina gobierno di Aruba a informa diadomingo atardi riba nan pagina di Facebook. Ta trata di 2 persona no-residente y 3 persona residente. E variante di Inglatera ta dos biaha mas contagioso cu esun original y p’esey autoridadnan ta haci un apelacion riba comunidad pa ta extra cauteloso. Den e siguiente dianan lo evalua medidanan aplicable pa e situacion aki.