Oduber: Cu e variante Britanico na Aruba ,e e risico di contagio ta aumenta drasticamente

ORANJESTAD – Cu e variante Britanico di Covid19 na Aruba, e risico di contagio ta aumenta drasticamente. Asina e minister di salud Dangui Oduber a bisa diamars mainta riba e noticia cu a keda presenta dialuna anochi cu e variante di Inglatera ta na Aruba caba. “ E preocupacion di e variante nobo ta e hecho cu e ta hopi mas contagioso cu Covid-19. Si anteriormente 1 persona por contagia 2 otro, e variante Britanico por contagia 6” e mandatario a bisa. “ Esaki ta pone cu e risico di contagio ta aumenta drasticamente”.

ACCION

Segun sr Oduber, Crisis team lo evalua e situacion teniendo cuenta cu cantidad di casonan activo, cantidad di casonan nobo pa dia, e positivity rate y situacion na nos hospital. “ E presion ta aumenta debi cu nos ta den pleno preparacion pa ricibi e vacunanan tambe cual sigur lo yuda den combatimento di e Covid-19 y e variante”. Departamento di Salud Publico (DVG) mester deal cu Covid-19, e variante nobo y na mes momento e vacuna. “Nos communidad mester ta alerto y sigui tur e reglanan y protocolnan. E virus tey y e chance pa plama mas liher ta existente” e mandatario a sigui bisa.

CORSOU

Pa loke ta e decision cu Corsou a tuma dialuna anochi mes di exigi test PCR di tur biahero for di Aruba pa Corsou, ta di spera. “ Nos ta compronde e decision di gobierno di Corsow y den esaki cada pais ta determina nan maneho y basa riba risiconan ta tuma decisionan. Aruba a introduci PCR test pa tur pasahero inbound desde juli 2020 y awe nos ta wak con mundo ta haciendo esaki tambe” e mandatario a sigui bisa.