Bishita di 3 profesor di New York University Steinhardt na Aruba

ORANJESTAD - Instituto Pedagogico Arubano (IPA), como instituto di enseñansa superior prome acredita na Aruba y tambe unico instituto cu ta 100% dirigi riba internacionalisacion, ta hopi contento di por a ricibi tres profesor, Rosa Maria Pietanza, Mary Leou y Anne Burgunder di NYU Steinhardt School of Culture, Education and Human Development na Aruba. IPA ta e unico instituto cu ta forma maestro pa enseñansa na Aruba. Un parti obligatorio di e curiculo ta un pasantia internacional cu e studiantenan di aña tres mester cumpli cu ne.

“Nos ta kere den internacionalisacion pa e nificacion cu e tin pa e desaroyo di nos studiante, docente y desaroyo di IPA, pero tambe pa nos enseñansa en general. Internacionalisacion ta trece un enrikecimento cultural y educativo den e desaroyo di nos studiante y docentenan”. E intercambio y experiencia riba tereno di e.o. siña, educa, investigacion y desaroyo humano, ta duna perspectiva nobo riba nos situacion den enseñansa na Aruba. E ta un fuente di informacion, enrikecimento academico y ta fomenta inspiracion pa innovacion.

“Nos mundo a bira un ‘small village’ y awendia tur cos cu pasa den e mundo ta interconecta. Esaki tin su consecuencia. Un ciudadano mundial por compronde miho e desaroyonan compleho cu ta tuma luga den nos mundo actual”. Durante e pasantia internacional e studiantenan di IPA ta bishita diferente Universidad. Esaki a lanta hopi interes bou di e universidadnan aki pa bin conoce IPA mas di cerca.New York University Steinhardt Steinhardt ta e prome cu a bini Aruba pa wak e desaroyonan na IPA pa loke ta trata un instituto duradero.

Perspectiva mundial, e base pa mas internationalisacion y colaboracion internacional

IPA, den un proyecto piloto, a profundisa e concepto ‘Desaroyo duradero’ den e fase Perspectiva Mundial, cu ta tuma luga den e di tres aña di estudio. Den e fase aki e studiante ta haya teoria tocante e concepto, bay cu pasantia internacional y implementa nan conocemento den practica na nos scolnan.

E aña aki atrobe IPA su studiantenan ta haci nan pasantia internacional na diferente pais. Un grupo di studiante ta bishita pa di cuater biaha New York University Steinhardt pa haci investigacion tocante e aspecto di multiculturalidad den scol na New York. Otro grupo ta bay TOWSON University na Baltimore pa haci investigacion dirigi riba democratisacion y desaroyo den enseñansa. Otro grupo di studiante ta bay Hulanda pa haci investigacion tocante e asina yama “ecologische voetdruk”. Tambe tin algun studiante cu ta bay Puerto Rico pa haci investigacion tocante idioma materno. Otro grupo ta bay Costa Rica y lo haci investigacion tocante democratisacion y desaroyo den enseñansa. Por ultimo, e aña aki pa prome biaha, nos studiantenan ta bay Spaña, Barcelona, pa haci investigacion tocante idioma y genero.

NYU Steinhardt, un Universidad hopi prestigioso na Merca, ta hopi contento cu e experiencia cu nos studiantenan y ta bishita IPA pa explora posibilidad pa colaboracion mas estrecho riba mas tereno. IPA a ofrece e profesornan un programa extenso pa nan haya un miho bista di e organisacion y structura di enseñansa na Aruba y loke IPA tin pa ofrece. Nan ta hopi contento y entusiasma y ya ta formula idea pa traha hunto riba proyecto di sostenibilidad pa scol y pa intercambio di studiante y docente.