Noticiacla ta desea bo un feliz Dia di Betico

ORANJESTAD – Awe Aruba ta recorda fecha natalicio di su yiu di tera porta mas conoci, Gilberto Francios ‘Betico’ Croes. Si e tabata na bida, awe e lo a cumpli 82 aña di edad. Docente di profesion, el a drenta politica na un edad hoben, y na caminda a funda e partido politico Movimiento Electoral di Pueblo (MEP). Responsabel e.o. pa inicia proceso pa Aruba haya su himno y bandera, y pa finalmente concretisa Status Aparte pa Aruba, el a fayece na 1986, e mesun aña cu Aruba a haya su status nobo. 

DIA DI BETICO

Tabata na aña 1992 bou di gabinete Oduber II, a decretal e fecha di si cumpleaños 25 di januari como un dia nacional y un dia liber. E dia mester sirbi como refleccion pa keda corda Betico Croes. Anualmente tin celebracion riba e plaza cu ta carga su nomber, unda cu tin e.o. manifestacion cultural un anochi prome y acto protocolario e dia mes. Ademas henter e isla ta celebra e dia cu actividadnan deportivo y cultural. E aña aki sinembargo debi na e pandemia coronavirus, tur actividad a keda cancela y prohibi, y a tene solamente e dos actonan principal, pero den forma virtual. Aruba, pabien cu dia di Betico, na nomber di Noticiacla y Wired Media.