Wever: Hulanda pa awor no ta bay cera frontera cu Aruba

ORANJESTAD – Hulanda por lo pronto no ta cera frontera pa Aruba. Asina prome minister Evelyn Wever a bisa diabierna mainta. Mientras cu pa awor Hulanda no ta cera frontera, esaki por cambia segun e prome mandatario. E mandatario a informa riba e situacion di Hulanda pa calma e nerviosismo cu tin aki na Aruba ora cu e anuncio a bin di Hulanda ,y cu minister Dangui Oduber a informa ariba durante su conferencia di prensa. E portal aki tabata prome pa raporta riba e tema. KLM tambe mientrastanto a sigura Aruba cu pa aworaki e no ta stop di bula pa nos isla. 

E SITUACION

E situacion na Hulanda relaciona cu e pandemia y mas aun e variante nobo, a pone cu nan a escala nan medidanan e siman aki y anuncia cu nan ta cera frontera pa varios pais y continente, y ta exigi double testing pa esnan cu ainda por biaha pa Hulanda. Esaki a bira un reto pa aeroliñanan Hulandes unda cu tin chens cu propio personal di cabina por keda atras si nan test positivo, mancando e buelo asina. A dicidi di cancela varios buelo (61) transatlantico, y a kere cu Aruba tambe lo forma parti di esaki. Esey pa Aruba ( y otro islanan di Caribe Hulandes) no ta e caso. 

ARUBA

E prome mandatario asina kier a trankilisa esnan cu tin pensa di biaha pa Hulanda (studiantenan p.e.) of tin cu biaha di Hulanda pa Aruba pa nan tene cuenta cu e situacion. Mirando cu e situacion por cambia rapidamente, e mandatario a pidi pa tene cuenta y keda pendiente constante di e desaroyo cu tin aworaki na Hulanda pa cu e buelonan aki.