Besaril: KLM a confirma di lo sigui bula pa Aruba

DEN HAAG  – E aeroliña Hulandes KLM lo sigui bula pa Aruba, no obstante e loke nan a anuncia diaranson, esta di para buelonan transatlantico pa motibo di medidanan nobo contra pandemia Coronavirus. Asina minister Plenipotenciario Guilfred Besaril a confirma diahuebs merdia, y a haya esaki confirma di ATA Europe y gobernantenan Hulandes. Segun e mandatario, tabata den secuencia di preguntanan (di noticiacla:red) haci na Minister di Turismo sr. Dangui Oduber relaciona cu vuelonan di KLM pa Aruba, Minister  Besaril den nomber di gobierno di Aruba a tuma contacto cu ATA Europa y dignitarionan Hulandes riba e asunto aki. KLM lo sigi bula pa Aruba. E confirmacion aki Minister Besaril, a haya for di su combersacionnan cu e instancianan concerni. ATA Europa E punto riba vuelonan di KLM a cuminsa despues cu go-bierno Hulandes a duna di conoce di lo introduci un restriccion riba vuelonan for di Inglatera, Sur Africa y Sur America pa Hulanda.

RESTRICCION?

‘KLM a indica cu e restriccion aki no lo conta pa e parti Caribense di Reino Hulandes y KLM ta spera cu no mester yega asina leu cu mester stop di bula pa e Aruba y e otro islanan’. Minister Be-saril a duna di conoce. Conforme e reglanan stipula pa gobierno Hulandes, Aruba ta un destinacion “Safe”. Te na e momentonan aki pasaheronan cu biaha di Aruba pa Hulanda no mester di haci un PCR test prome cu subi avion y tampoco mester bai den cuarentena na momento cu nan yega Hulanda. Despues di e debate den Parlamento Hulandes lo bira conoci si e parti aki di test y cuaren-tena lo keda igual. 

SATISFECHO

Minister Besaril ta satisfecho cu e informacion ricibi di e instancianan competente, comokiera cu na momento cu KLM stop su buelonan pa Aruba, esaki lo tin su impacto tanto riba turismo como transporte medico. Tambe e lo por afecta e aspecto di transporte di carga y conectividad general entre Aruba y Europa. 

MEDIDANAN 

Un di e medidanan cu gobierno Hulandes a pone riba mesa ta cu pasahero y tripulacion di e aero-linea mester haci un “Sneltest” prome cu nan bula bai Hulanda. Medionan di comunicacion na Hu-landa ta bisa cu KLM lo mester scrap tur vuelonan intercontinental. KLM di su banda kier evita cu tripulantenan cu test positivo pa Covid-19 keda atras den un pais leu for di cas. Y esaki segun un vocero di KLM, no ta cuadra cu polisa di e compania, pues un situacion delicado pa KLM y cu Minister Besaril ta spera cu aclarea den e dianan cu ta bin.