Oduber: Hulanda lo tin e deseo pa Aruba tambe cera frontera cu Latino America

ORANJESTAD – Hulanda lo tin e deseo pa Aruba tambe cera frontera cu Latino America pa motibo di e pandemia di Covid19. Asina minister di turismo Dangui Oduber a informa e portal aki durante su conferencia di prensa diahuebs mainta. “E ta wordo considera” e mandatario a bisa. “Tin e posibilidad tambe cu KLM por stop buelonan pa Aruba” e mandatario a sigui bisa. Esaki relaciona cu e decision cu e aeroliña a tuma diaranson di cancela buelonan transatlantico. Debi cu oficialmente KLM no a specifica si Aruba (y otro islanan di Caribe Hulandes) tambe ta forma parti di dje, a puntra e mandatario si e si a tende algo oficial di e aeroliña. Esaki a resulta negativo.

COMPLICACION PA ARUBA

E mandatario a mustra un panorama cu por surgi si tanto Hulanda pidi pa cera frontera cu Latino America y KLM stop di bula pa Aruba.  Esaki pasobra si esaki sosode, nos no ta perde solamente entrada na possible turista for di Hulanda y Europa, pero e transportacion di remedi (incluyendo e vacuna contra Covid19). Y esaki ta bira un problema serio. “KLM ta e aeroliña cu ta transporta e ‘cold chain’ di medicamento pa hospital” sr Oduber a bisa. Como tal e mandatario a bisa cu gobierno ta den combersacion cu VNO (representacion di gobierno Hulandes na Aruba) tambe, pa wak si finalmente kico ta e posicion cu pais Aruba ta tuma referente e ciere di frontera cu Latino America. 

CRISIS TEAM

E mandatario a sigura cu durante un reunion di Crisis Team awe diahuebs atardi, si tin cualkier decision cu cay durante e reunion aki riba e.o. e ciere di frontera cu Latino America, esaki lo wordo comunica den un conferencia di prensa despues cu e crisis team termina su reunion. 

HULANDA

A bisa tambe cu si Hulanda of KLM dicidi di stop buelonan pa cu Aruba, e lo tin consecuencia pa nos, ya cu mester busca otro alternativa pa medicamentonan pa hospital keda manteni na tur momento. “Mi no ta kere cu Hulanda lo ta asina iresponsabel di tuma un decision di stop cu buelonan di KLM y laga pais Aruba sin e remedinan cu ta sumamente necesario pa trata muy especialmente e pashentnan di Covid19.