Trahadonan di Serlimar a drenta den accion awe mainta

ORANJESTAD – Un total di 120 trahado di Serlimar a dicidi di blokia entrada di dump, como forma di protesta awe mainta pasobra nan no a haya nan pago di luna. Nan a haci esaki usando tur e trucknan di sushi di  e compania. Presidente di e sindicato representativo di e trahadonan, esta Diego de Cuba a confirma na NoticiaCla.com awe mainta cu enberdad e accion tabata pa esey. Mes momento a nota otro candela grandi cu huma preto na dump na parkietenbos, pero de Cuba a sigura cu esaki no ta trabou di e trahadonan sino di otro hende. Tambe de Cuba a remarca cu ya a haya un solucion parcial pa e problema di e trahadonan y cu pa fin di dia, e accion lo mester a termina ora cu tur trahado toch ricibi nan placa.

PLACA

E problema, segun de Cuba, ta ora cu trahadonan di Serlimar a nota cu nan no a ricibi nan pago di luna. Investigacion mesora via nan sindicato, a determina cu ta un fayo di comunicacion cu e banco cu e compania ta traha cune. Como tal a logra convence e gerencia pa remedia e situacion segun de Cuba, cu a pone cu a palabra cu pa 11’or di awe mainta caba, tur trahado cu tin cuenta na e banco di e compania, lo a haya nan placa deposita riba nan cuenta. Esnan cu no tin e banco ey, lo mester a haya e placa den forma cash via check den curso di dia. Tanten, e trahadonan cu no ricibi pago, lo a keda den accion dilanti entrada di dump na Parkietenbos.

MAS PROBLEMA

Segun de Cuba, e ta un serie di punto cu a culmina cu e fayo den pago, cu e trahadonan a dicidi di bay den accion awe mainta. E situacion na dump, segun e lider sindical, ta uno caotico unda cu a manda varios carta pa e minister concerni, sin cu a haya reaccion. A manda un carta awe atrobe cu ‘caracter di urgencia’ pa un reunion pronto, sino por spera un otro accion otro siman.