Si no bin cambio, por lo menos 10 oficina di dokter di cas lo cera na Aruba

ORANJESTAD – Si no bin cambio den e situacion di reduccion di gasto obligatorio den sector di cuido, por lo menos 10 docter di cas na Aruba (di e total di 48) lo tin cu cera nan porta proximamente. Asina presidente di e asociacion di dokter di cas na Aruba HAVA, drs Juaquin van Trigt a bisa den e programa Noticiacla LIVE diamars anochi. Esey kier men cu un total di 20 mil persona (pashent) lo keda sin dokter di cas y tin cu bay mas sigur cerca un otro, cu tur su consecuencianan. Van Trigt ta considera esaki serio pero no por a bisa exactamente cuanto tempo e practica di dokternan di cas aki por wanta ainda.

CERA PRACTICA

Van Trigt ta mustra cu como cu e tin 10 aña trahando como dokter di cas, e por a traha un buffer y por a maneha. E mester a baha su salario, usa su savings pues el a logra y cu ayudo di banco. Pero esnan cu ta nobo y cu tin poco tempo trahando, e storia ta otro. Segun van Trigt, ta trata aki di e dokternan cu ta ‘nobo’, den sentido cu nan no a logra traha un ‘buffer’ financiero pa sobrevivi e cortamento den gasto medico. Pa duna un indicacion con serio e situacion ta, e presidente di e asociacion ta mustra cu tin coleganan cu echt no tin buffer. “Aworaki di baina nan ta wanta nan rosea riba awa. Mi sa cu tin coleganan cu ta fia di otro coleganan temporariamente, cu nan ta traha hunto cu ne pa paga nan gastonan, cu nan ta bisa di lo paga bek manera un lening” van Trigt ta sigui bisa. Eynan caba ta mira cu mester resorta na cosnan basta extremo pa bo yega na paga bo gastonan mensual. “Te cu December 2020, a logra net net, pero going forward pa 2021,  mi ta kere cu un par di nos praktijknan ta bay mester stop, pasobra nan no por sigui asina”. Ora cu a puntra van Trigt, di cuanto e ta papiando cu mester cera, el a bisa cu un calculacion rapido, ta bisa cu por lo menos 10 tin cu cera nan porta. 

CONSECUENCIA

Si tene cuenta cu cada dokter di cas tin mas of menos 2.300 pashent pa trata, unabes cu e 10 dokternan di cas stop di funciona, e pashentnan aki mester bay otro caminda cu tur su consecuencia. “Ora cu 10 praktijk stop, esey kier men cu bo tin 20 mil pashent cu no tin dokter di cas. Bo tin cu bay reparti entre praktijknan cu tin y cu ta keda activo. Y op een gegeven momento, e praktijknan ta bira hopi mas grandi, y e werkdruk ta bira di e estado cu e praktijk no ta funciona mas” van Trigt a sigui bisa. “E calidad di cuido ta bay sufri inmensamente. Tin tanto pashent pa dia cu nos por wak, y si e cantidad di hulpvraag subi, dan kunnen we het op een gegeven moment niet meer aan!” van Trigt a sigui bisa. 

MESTER YEGA NA SOLUCION 

Ta pintando e scenario na gobierno di Aruba cu no tin otro opcion pa cu siguimento di cortamento den cuido no conduci na tipo di situacionan asina. “Pues nos ta spera cu esaki ta habri wowo” van Trigt a sigui bisa. E no ta kere cu ta warda largo mas. E negosacionan ta sigui y ta spera cu por yega na solucion caminda cu por evita cu e situacion bira asina dramatico.  Pa wak e programa, click AKI.