Camara di Comercio ta boga pa ‘make-over’ di dialogo social

ORANJESTAD – Camara di Comercio (KvK) kier pa e dialogo social den e forma actual cambia y pasa pues door di un ‘make-over’. E gremio comercial aki a manda un señal pa gobierno cu puntonan cu e lo kier mira cambia pa haci e dialogo social mas miho y efectivo. Y su mensahe tabata basta cla. Segun e gremio, den cuadro di e celebracion di cinco an?a Dialogo Social, Camara di Comercio y Industria Aruba (KvK) ta desea di evalua e puntonan positivo y esnan menos positivo di e proceso di consulta aki pa por logra mehora y aumenta su balor pa e partnernan social.

PARTICIPACION

KvK a participa desde e inicio di e dialogo social pero ta di opinion cu pa e dialogo social ta un exito, e mester ta basa ariba teamwork y asina contribui na mas comprension entre e partnernan. Cu no semper ta yega na consenso riba tur topico ta algo natural, mirando e diferente interesnan cu ta representa na mesa.

Ariba e aspecto aki, KvK ta boga pa mehoracion den e dialogo social pa asina por yega na un resultado mas balansa.

PUNTONAN DI MEHORACION

Algun di e areanan di preocupacion di KvK ta:

- Agenda: esaki mester bira un esfuerso mutuo, y no solamente e puntonan treci dilanti pa gobierno.

- Ta necesario limita e agenda na e puntonan di mayor interes socio-economico.

- Meta y resultado mester refleha esfuerso di cada participante. Actualmente, despues di firma protocol ta solamente e puntonan di interes pa gobierno ta wordo efectua.

Un punto di agenda cu KvK continuamente tabata pidi pa pone riba agenda e ultimo an?anan, ta finanzas publico. Ora cu finanzas publico di un pais ta den mal estado, esaki tin un impacto directo riba e economia di e pais cu consecuencia cu gastonan di haci negoshi ta aumenta y finalmente mester introduci medidanan cu lo bay afecta tanto sector priva, como pueblo en general. Esaki ta loke nos ta wak ta pasando actualmente.

FINANZAS PUBLICO

Segun Kvk, mientras no tin claridad con pa sanea Aruba su finansas publico, no por bai pensa riba discusion di otro tema.

KvK ta mantene su posicion cu Aruba mester di un “business friendly environment” cu ta facilita e proceso di haci negoshi. KvK ta urgi gobierno pa haci e reforma necesario pa stimula entrepreneurship, cu consecuentemente lo beneficia henter e comunidad por medio di desaroyo y crecemento economico, creacion di trabao nobo y salvaguardia empleo existente. E facilidad pa haci negoshi eventualmente lo mehora nos calidad di bida y stimula crecemento y prosperidad.

Finalmente, Camara di Comercio ta sigur cu por medio di dialogo continuo, cu ta inclui y beneficia tur partner sinta na mesa, por logra resultado positivo cu lo yuda mehora stabilidad y prosperidad di nos economia y bienestar a largo plazo pa tur ciudadano.