No ta permiti publico na acto protocolario y manifestacion cultural pa Dia di Betico

ORANJESTAD – Contrario na añanan anterior, e aña aki (aña pasa tambe e tabata asina) pueblo lo no ta permiti pa ta fisicamente presente na e actividad protocolario ni esun di manifestacion relaciona cu Dia di Betico. Asina minister di Cultura Xiomara Maduro a bisa durante un conferencia di prensa dialuna mainta riba e tema. Motibo ta Covid19 y e protocol cu tin rond di esaki. E eventonan lo tuma lugar na e sitio di custumber, pero polis lo sigura cu comunidad no por ta presente door di e.o. cera e camindanan y area respectivo na e lugarnan. Ta lamenta esaki pero ta invita pueblo mesora tambe pa wak e eventonan si cu lo wordo televisa pa tanto Tele Aruba y otro medionan social. 

PERMISO

Pa loke ta eventonan cultural riba e fecha mes, e mandatario a bisa cu lo no duna permiso pa actividadnan social cultural. Ademas ora cu tin hendenan hunto na cas, esaki no por surpasa 25 persona. Pero no por tin eventonan na p.e. centronan di barrio of otro tipo di evento cu ta celebra e dia aki.