Bochincha Container Yard a hiba banco corte pasobra no kier habri cuenta bancario

ORANJESTAD – Contrario na otro banconan comercial, ta te na final Aruba Bank a bisa cu nan no ta habri cuenta bancario pa Bochincha Container Yard. No manera otro banconan cu a bise no mesora ora cu el a bay eynan despues. Pues Aruba Bank a duna un impresion te final cu el lo a habri e cuenta. Asina e ex minister awor empresario Otmar Oduber a bisa huez awe mainta den Corte entre otro. Manera relata caba, awe mainta tempran Corte a cuminsa tratamento di e caso cu Bochincha Container Yard (BCY) di ex minister Otmar Oduber a inicia contra Aruba Bank pa motibo cu e instituto financiero no kier habri cuenta di banco pa e compania nobo cu ta opera comercialmente como Bonchincha Container Park. Den e prome puntonan presenta awe mainta, e abogado pa BCY mr Alan Kuster a argumenta cu ningun banco, incluyendo Aruba Bank kier habri un cuenta bancario. E motibo duna, ta cu e ‘escandalo cu e ta envolvi den dje, por trece publicidad negativo pa e banco’. A cuestiona e hecho pakico no ta cuestiona otro companianan. 

PLACA CASH

E problema segun abogado di BCY, ta cu tur dia ta traha placa cash den cantidad grandi y esey ta algo peligroso. E placa cu ta drenta segun e abogado, ta placa limpi. Pero cu mester di un cuenta di banco, pasobra e.o. DIMP ta digital aworaki y pa impuesto, e compania mester tin un cuenta bancario pa por haci su transacionnan corespondiente. A mustra cu for di juli aña pasa ta purbando pa habri un cuenta y no ta logrando. Tambe loke e (Oduber) no ta compronde, ta e hecho cu e mesun banco a habri cuenta pa negoshi di su yiu aña pasa, y e mes ta cliente di e banco pa hopi aña y henter su famia ta cliente y negoshi cu cuenta eynan. 

BANCO

Di parti di e banco,  abogado Theresa Croes (por cierto tabatin representante di Anti Money Laundry Officer di e banco presente) a mustra cu autoridad ta obliga pa haci un investigacion di cliente y si tin risico, cu por tin fraude of labamento di placa, no ta tume como cliente. Banco Central di Aruba (CBA) ta obliga nan pa haci investigacion, y ora cu ta haya e riesgo mucho halto, nan no ta habri cuenta bancario. Ademas no ta compronde e interes di sr Oduber den e caso ami pasobra ta Bochincha Container Yard ta esun cu no por habri cuenta. Y ta bisa cu a tarda 4 luna pa un peticion pa habri cuenta. Ademas ta cuestiona e urgencia di e caso mirando cu a cuminsa un caso despues cu a habri e negoshi (BCY). A cuestiona tambe pakico no a demanda otro banconan y ta solamente Aruba Bank nan ta demanda. A mustra tambe cu prome cos cu tin cu haci, ora cu cuminsa un negoshi, ta habri un cuenta bancario. 

NO MAG

Loke cu a trece sospecho pa e banco, segun e relato den corte, ta cu BCY lo a usa otro cuenta pa placa, cu no ta permissible. A splica cu tabata swipe riba e cuenta platinum di e yiu homber di Oduber, cu ta mande pa e cuenta di consultancy di Oduber, cu a keda habri na maart di aña pasa. Ta eynan e prome sospechonan a cuminsa lanta. Y e practica aki, segun regla di BCA no ta ser permiti. 

HUEZ 

Den corte huez dado momento a puntra e abogado di Oduber, cu si e tin problema cu nan, esta Aruba Bank, pakico e ta insisti cu nan. Segun Oduber, e tin un relacion di 30 aña cu e banco y henter su famia semper tabata cu e banco. Y e no sa kico BCY tin di haber cu e investigacion contra dje. Ademas, el a splica huez cu el a kere cu e lo a haya e cuenta. De hecho te un siman prome cu e apertura ainda tabata sigur cu ta habri e cuenta. Segun Oduber, nunca el a haya un no. A crea e impression pues cu lo habri e cuenta bancario. Na ultimo, el a bay puntra na un otro banco y nan a bise di biaha no. No manera Aruba Bank cu a wante na liña pa despues bise no.

CON BCY TA OPERA

A splica cu tin 11 negoshi total den e Container Yard, y nan tur tin nan cuenta y ta laga cliente swipe. Na final ta calcula kico ta di cada negoshi y si e pago ta cash, credit card of bancomatico, y ta paga otro. Keda pendiente pa actualisacion di e caso. E potret ta di e awor empresario Otmar Oduber drentando Corte awe mainta.