Petra Smit a huramenta como abogado y uni cu bufete DKLegal

ORANJESTAD - Petra Smit a huramenta como abogado y join bufete DKLegal.  Petra a gradua di Universidad di Aruba riba 13 di november 2019 y ta trahando na DKLegal desde augustus 2019 caba. Petra ta naci na Aruba y a bai studia na Hulanda despues cu ela slaag VWO na Colegio Arubano. Ela bai Hulanda pa studia criminologie, pero a ripara hopi lihe cu e trabao no ta uno 'riba caya' manera ela kere, sino lo ta den oficina henter dia ta lesa file tocante sosodidonan y traha rapport a base di esakinan. Ela disidi di stop cu e estudio criminologie y a bai studia algo completamente diferente, technische wiskunde. Petra semper tabata tin e 'exact paket' na Colegio y semper a gusta wiskunde. E ta mirele manera hunga puzzel, caminda cu mester busca un solucion pa un problema. Debi cu e materia tabata hopi avansa, lastimamente Petra mester a stop cu e estudio y no a logra haal su diploma. Na 2013 Petra a regresa Aruba sin diploma den man. Pa casualidad ela haja e chance di haci e curso di arbeidsrecht di Enseñansa pa Empleo. Di eynan Petra su interes pa studia ley a cuminsa y el a disidi di bai p’e y a logra su master diploma na november 2019. Petra ta mira su mes como un ehempel cu nunca ta laat pa cuminsa un reto nobo pa mehora bo mes, asta despues cu bo a faya den pasado. 

Danki na su perseverancia awe Petra tin e titulo “Meester in de rechten” y e extra logro di a huramenta como abogado. Como abogado Petra lo reenforsa e team di abogado di DKLegal, cu awor ta consisti di mr. David Kock, mr. Demis Illes, mr. Evelyn Cafarzuza y mr. Petra Smit. Hunto nan ta forma un team cu amplio experticio riba entre otro casonan laboral, civil, penal, familiar y administrativo. 

Por tuma nota di varios relato informativo cu e team di DKLegal a publica cu ta demonstra nan motivashon pa informa pueblo di e leynan local y e consecuensianan cu esakinan por tin pa comunidad. Specialmente den e realidad actual, cu hopi insiguridad y hopi cambio den ley cu consecuencia relativamente drastico pa e comunidad, ta di gran importancia pa keda vigilante y critico riba e desaroyonan. Awor cu e adicion di Petra como abogado, DKLegal ta spera di por juda mas aun e comunidad di Aruba pa bringa pa su derechonan.