Aruba ta conoce otro barera pa turismo cu medida di CDC

Aruba ta conoce otro barera pa turismo cu medida di CDC

Posted on 01/13/2021 9:35 am AST | Updated on 01/13/2021 9:42 am AST

NEW YORK (AP) — Cualkier persona biahando pa Merca dentro di poco, mester por mustra un test negativo di COVID19 sino e no por drenta. E medida di e Center For Disease Control (CDC) ta drenta na vigor dia 26 di januari proximo. E ta un medida cu varios estado Mericano ta usando caba, incluyendo e mercado mas grandi pa Aruba, pero awor e ta bira uno general obligatorio pa tur estado. Esaki ta nifica cu e ta conta pa tur turista Mericano cu bolbe nan pais despues di nan vacacion. Y e mester tuma lugar dentro di tres dia cu nan biahe ta tuma lugar. Esey ta nifica pues, cu nan tin cu paga dos biaha pa COVID19 test, uno prome cu nan biaha pa Aruba y despues ora nan bolbe. Y consecuentemente manera ofina di turismo di Aruba (ATA) su CEO Ronella Croes ta bisa noticiacla awe mainta, e ta bira un barera adicional cu Aruba tin cu atende cu ne. 

REGLA EXISTENTE CABA

Asina mes, sra Croes ta sigura cu e no ta algo nobo y cu varios estado Mericano, incluyendo New York, e mercado principal pa Aruba di Merca, tabatin esaki como rekisito caba. 

IMPACTO

Segun sra Croes, no por bisa ainda kiko e impacto lo ta. “ Nos tin cu monitorea con bookings lo sigui move y si lo tin cancelacionnan mara na e rekisito nobo aki” e CEO di ATA a bisa e portal awe mainta. “ Si, mi por bisa cu nos a anticipa e decision aki y tabata den contacto directo cu Center For Disease Control (CDC), como Aruba. Nos a reitera na CDC cu Aruba tin inventario y tur locual ta rekeri pa brinda e servicio di test necesario. 

CARTA PA SOCIONAN

Tambe ATA a comunica cu socionan aereo / tour operadornan / hotelnan / consulado di Merca /CBM e.o. for di siman pasa y e siman aki cu un carta subrayando e hecho cu Aruba ta un destino unda e consumidor / nan clientenan lo por sigui conta cu e servicio necesario. 

LANDING PAGE

Sra Croes a informa tambe cu e portal di Aruba, www.aruba.com, lo tin un landing page cu tur informacion entrante awe, y ATA lo sigui sigura cu socionan y e consimidor por conta cu tur info cu tin mester.

SEGURO

Mester añadi cu ta bon pa sa cu seguro Aruba Visitors Insurance lo cubri casonan positivo cu por resulta di e rekisito nobo aki, esta cuarentena / isolacion y transportacion. E test cu mester haci pa regreso si no ta cubri bou di e seguro. Potret cortesia Forbes.com

 

 

 

 

 

  • Powered by SETAR