Cantidad di pashent hospitalisa pa COVID19 a surpasa 20 awe

ORANJESTAD – E cantidad di pashent hospitalisa pa COVID19 a aumenta den e ultimo 24 ora y surpasa 20. E cantidad exacto ta 21, cu ta 3 mas cu un dia prome. E cantidad ta subiendo pa dia cu average di 3 pa 4 pashent. Y loke tambe ta hala atencion ta e hecho cu e cantidad di pashent den ICU tambe ta aumenta y awor a yega 9 pashent. Riba piso, tin 12. 

SITUACION HOSPITAL

Anticiipanto e situacion aki, noticiacla dialuna a puntra e director di hospital Jacco Vroegop, con e situacion actual ta pa hospital. E la bisa cu enberdad e casonan a aumenta, pero cu ainda hospital ta ok, pasobra tin 22 cama disponible y operacional pa pashentnan di COVID19. Entrante awe, e cantidad cu ta usando ICU pa COVID19 ta 9 pashent. Esey kier men cu tecnicamente ta nifica cu tin espacio pa 13 mas, aunke e problema ta cu si tin pashentnan cu no ta COVID19, nan por haya e cambernan ey tambe. Y cu miras riba esaki, a impone un Toque de Queda pa mitiga e posibilidad di accidente of otro casonan traumatico cu ta rekeri  uso di cambernan di ICU. Polis a informa e portal aki un tempo pasa cu interesante ta cu mayoria caso traumatico for di tempo di implementacion di e Toque de Queda, ta sosode pafo di e orario di TDQ. “Pero, ta keda e accidentenan na cas mes” e director a bisa, indicando cu no ta solamente esnan riba caya ta accidenta y bin ICU, sino tambe accidentenan cu ta sosode otro caminda cu no ta trafico. E situacion a pone cu hospital a aumenta nan capacidad di cama regular pa piso y personal pa atende cu COVID19. Pero ainda nan no a mira necesidad pa para operacion y tratamento ‘regular’ di pashent manera cu a sosode den pasado recien (aña pasa). Debi na e aumento di caso e tempo ey (riba 40 caso hospitalisa) mester a para tur otro operacion y tratamento. Tabatin tambe personal di hospital mes cu tabata malo y cu a crea un scarsedad enorme y presion y stress extra riba e personal cu si tabata na hospital. Awe e situacion ey ta diferente te ainda, y tin ‘suficiente’ personal. Asina mes, e cantidad ta aumentando tur dia di pashentnan hospitalisa, y e situacion por eventualmente bira di tal forma cu mester bay para otro tratamento. Potret ta di archivo di noticiacla di un pashent di COVID19 cu a keda hospitalisa aña pasa.