Presupuesto di Aruba pa aña 2021 por yega Parlamento fin di februari

ORANJESTAD - Presupuesto di  pais Aruba pa aña 2021 por yega Parlamento fin di februari. Asina minister di finanza Xiomara Maduro ta laga sa e siman aki.  E ta admiti tambe cu normalmente Presupuesto di Pais Aruba mester wordo entrega na Parlamento di Aruba prome cu  dia 1 di september di e aña prome. No ta tur aña Gobierno ta logra entrega e Presupuesto na tempo. Pa esaki tin diferente motibo pa cual ta traha pa trece mehoracion pa asina por agilisa e proceso presupuestario di nos Pais pa por cumpli e terminonan stipula den nos Ley di Comptabilidad. E biaha aki mester remarca cu e retonan cu COVID19 a trece cune, por ehempel, e medida di shelter in place, e negosacion cu Hulanda y e hecho cu ta keda dificil pa calcula e impacto economico di un pandemia, a afecta e proceso presupuestario y a trece un retraso grandi cune. Pa e motibo aki Gobierno no por a entrega e Presupuesto na tempo y ta premira cu Presupuesto 2021 lo yega Parlamento di Aruba pa fin di februari.

WARDANDO RIBA CAFT y RAAD VAN ADVIES

Minister Maduro ta informa cu Presupuesto 2021 tabata cla na comienso di december 2020, pero a opta pa warda pa haci algun cambio basa riba e calculo economico mas reciente, prome cu manda e Presupuesto pa conseho na CAFT. Na e momentonan aki Gobierno ta wardando riba e conseho di CAFT, pa asina despues por manda esaki hunto cu e concepto di Presupuesto 2021 pa Raad van Advies pa nan conseho. Pa fin di februari Gobierno ta premira cu lo por ricibi e conseho di Raad van Advies pa asina por manda e concepto di ley di Presupuesto 2021 pa Parlamento di Aruba pa su debate y aprobacion.