Reunion entre gerencia y sindicato di HOH ta continua diamars

ORANJESTAD – Negosacionan entre gerencia di Horacio Oduber Hospital (HOH) y sindicato di trahadonan di hospital ABV a cuminsa dialuna merdia y lo continua e proximo dos dianan. Asina tanto e director di HOH Jacco  Vroegop y presidente di ABV Gina Maduro a confirma durante un conferencia di prensa mutuo dialuna atardi. Ambos ta optimista pero no kier a laga nada los di ki rumbo e negosacionan ta bayendo. 

E SITUACION

E director a mustra cu e ta compronde e frustracion di e sindicato y e trahadonan y cu nan a bay den accion. E forma sinembargo no tabata necesario ya cu por a sinta na mesa y papia cos. De hecho, despues di un carta y reunion diabierna, no a kere cu esaki lo a desemboca den un accion awe mainta. E presidente di sindicato a mustra cu e unico cos cu nan kier awor (no ta ni pidi pa bonus manera cu e otro islanan a haya) ta pa no mishi cu nan salario mas. Si nan logra esaki, tin cu wak ainda. 

CARTA 

A splica tambe cu a manda un carta pa tanto VNO como secretario di estado Raymond Knops cu e peticion pa wak kico por haci riba e cortamento di gasto, y con por mengua esaki. Asina por haya sa e espacio cu por tin pa cu e trahadonan aki. No a haya un contesta ainda y ta spera cu esaki yega pronto. Tabata recien durante bishita di e mandatario Hulandes, unda cu e portal aki a puntra e mandatario riba e posibilidad ey, esta di para e 5% di cortamento di salario. Mientras cu e mandatario no a duna un contesta concreto, el a indica si cu ta dificil y cu tur hende, tambe e trahadonan di hospital, mester ta solidario cu e situacion unda cu debi na COVID19 tin hende cu a perde salario y trabou completo. A reserva dos dia, cuminsando diamars 3pm unda cu un biaha mas lo reuni cu otro y wak con ta sali for di e ‘impasse’ aki.