Lampe: Cantidad di docente na CSN a manipula cu rooster pa mas placa

ORANJESTAD – Un total di 16 docente na Colegio San Nicolas (CSN) lo a manipula na e scol, cu rooster di scol y materia, cu e intencion pa haya mas placa pa e trabou. Esaki e mandatario di enseñansa Rudy Lampe a bisa durante e conferencia di prensa di gobierno dialuna mainta refiriendo na un rapport inspectie  traha cu a keda cla y publica recientemente. Segun e mandatario, tur esaki ta rekeri pues pa e scol haya un reset dentro di poco.  E rapport recien ta ilustra, -segun e mandatario-, e problemanan structural na e scol cu ta exigi cu mester haci cambionan na e scol di tal forma cu alumnonan no ta perhudica mas. E nombernan di e 16 docentenan ta publica den e documento, cu lo a wordo poni na disposicion di prensa. (Noticiacla no a ricibi esaki ainda si).

MATERIA DI NATUURKUNDE

Un otro problema cu a keda atendi ta e hecho cu for di October aña pasa, e alumnonan di e materia di Natuurkunde, no a haya e materia aki presenta, y a keda asina perhudica. Entre e problema, cu e siman aki (mayan) tabata programa pa un SE (examen periodico) di practica di e materia pa tuma lugar. Un materia cu no por wordo ‘ripiti’. Pero e mandatario riba pregunta di prensa, a sigura cu e examen aki lo keda posponi te proximo aviso y chens pa haci esaki di nobo tambe. E situacion di COVID19 mescos cu a haci na Hulanda, ta permiti e excepcion aki. Di otro banda, e mandatario a lesa un parti di carta di un docente di e materia, cu ta reclama cu e alumnonan no ta haci nan trabou como debe ser y cu e ta teme pa nan pa cu e resultado, debi na e falta di atencion na e materia aki. Y segun Lampe, ta trata di alumnonan cu e aña aki tin cu bay studia na Hulanda p.e. Pues indicando cu cu si awor caba nan ta asina, corda con nan lo ta na Hulanda. 

PROBLEMA STRUCTURAL

E rapport tabata mustr cu pa añanan pa un manera artificial, tabata pone oranan extra pa cierto materia pa cierto docentenan contra loke ley ta stipula pa lessen table. Y otro materia tabata haya menos ora,. Un situacion contra ley y cu realmente a perhudica e muchanan, e mandatario a bisa. “Ta fout cu bo no por coregi durante e ultimo añanan”. Segun e mandatario, tabata manipula pues cosnan na e scol na beneficio di cierto docentenan. E mandatario a referi na 16 docente cu a actua contra etica professional, teniendo e.o. cifranan atras di muchanan pa x motibo, pa pago di overtime, sin cu nan tabata traha nan of merece nan. Asina e mandatario a bisa, refiriendo na e rapport cu a keda traha riba e situacion na e scol.

TRASPASO DI MANDOTambe e mandatario a bisa cu e ex conrector ora cu el a retira, no a haci e traspaso manera mester ta. Segun Lampe, pueblo a hinca basta placa den su formacion, y e no a traspasa e conocemento aki pa otronan por a continua cu e trabou. “Contra tur etica professional” sr Lampe a bisa.