DCA: Na memoria di Sr. Leonardo ‘Leo’ Tromp

DCA: Na memoria di Sr. Leonardo ‘Leo’ Tromp

Posted on 01/10/2021 5:48 pm AST | Updated on 01/10/2021 5:49 pm AST

ORANJESTAD - Señor Leonardo ‘Leo’ Tromp a nace na Aruba riba 5 di juli 1943, tabata casa cu Sra. Alicia A. Yarzagaray hunto nan tin dos yiu hombre Sergio y Angelo y un yiu muhe Sharissa Arends-Tromp. E tabata yiu di Angel ‘Chonan’ Tromp y Gudelia Tromp-Lacle.

Señor Leo Tromp tabatin ya 22 aña den Servicio di Teritorio Insular di Aruba y ultimo ey tabata traha na Departamento di Asuntonan di Enseñansa for di unda el a pidi un traslado pa Instituto di Cultura Aruba (ICA). Riba dia 1 di maart 1982 a keda nombra como Hefe di Instituto di Cultura Aruba. Asina e bira e di dos Hefe di ICA despues cu Sr. Hubert Lio Booi a baha cu pensioen.

E seccionnan na ICA despues di 1982 tabata:

-        Socio-Cultural: Actividadnan cultural, escolar y social;

-        Conservacion di Patrimonio y Cultura;

-        Promocion di folklor, artesania, pintura, musica y canto, etc.;

-        Watapana/Bonbini Festival (51 biaha pa aña);

-        Difusion di nos tradicionnan (San Juan, dera gay/Dande/Tres Rey/ Weganan Popular);

-        Promove uzo di Papiamento (ICA tabata e prome departamento di Gobierno cu tabata manda nota’s/conseho’s na Papiamento);

-        T.V. y radio (ICA tabata traha diferente.

Durante un periodo di 1 di april 1991 te dia 31 october 1994, E tabata ‘ter beschikking’ di resp. Aruba Tourism Authority, Den Haag y despues na despacho di Ministerio di Educacion y Ministerio di Finansas. Durante e ‘ter beschikking’ el a keda Hefe di ICA.

Den e tempo cu el asumi su funcion como Hefe di ICA, e edificio tabata situa den e asina yama ‘Maria Convent’ na J.E. Irausquinplein # 2 -A na Oranjestad. El a haci permiso pa reastauracion di edificio di ICA.

Dia 1 di november 1994 el a continua cu su encargo como Hefe di ICA, despues di su ‘ter beschikking stelling. Y e tempo ey ICA tabata temporalmente den e asina yama ‘Layex Building’ den Wilhelminastraat. Esaki debi cu e edificio di ICA na J.E. Irausquinplein # 2-A tabata ser restaura.

Cu meta di ICA den preparacion pa cu nos Status Aparte ta pa comunidad Arubiano ta consciente di e existencia di Instituto di Cultura Aruba, cu ta e instancia gubernamental encarga cu conservacion, mantencion, promocion y difusion di nos cultura den e forma mas amplio. Pa realisa cu Cultura no ta referi unicamente na e diferente disciplinanan di arte, pero tambe na e forma general con nos comunidad y como pais a y ta desaroya.

Debi na e hecho cu su persona durante e añanan na ICA, tabata alabes, miembro di diferente fundacion (C.C.A. / Schouwburg, UNOCA), tabata entrega proyectonan na e instancianan aki, pa coopera den diferente actividad di ICA of conhuntoamente cu ICA (Fo’i e tempo ey caba por pensa riba diferente actividad riba Plaza Betico Croes of promocion di gruponan den exterior, tambe cu ATA). Si no pone suficiente fondo y personal cualifica, ICA nunca lo por funciona debidamente y esaki ta un lastima, pasobra “Un Pueblo sin Cultura, ta un Pueblo sin desaroyo.”

E desaroyo di cultura en general desde añanan ’50, ta danki na loke fundacionnan priva, manera e.o. ‘Stichting Cultureel Centrum Aruba’ a haci cu fondonan cu Hulanda anualmente ta pone disponible. Casi tur proyecto cultural grandi na Aruba, a ser financia cu fondonan cultural Hulandes, a traves di ‘Stichting CCA. Na 1985, un parti di e fondonan cu Hulanda ta pone disponible pa cultura na Aruba a ser poni na disposicion di Fundacion UNOCA y casi por bisa cu ta e UNOCA tin di bisa riba e desaroyo cultural na Aruba.

E tempo aya caba Sr. Leo Tromp tabata puntra: “Con por tin un maneho di cultura sin e fondonan necesario?”

Manera a ser contesta den e pregunta anterior: Gracias na un bon relacion cu tanto Fundacion CCA y UNOCA, Instituto di Cultura Aruba por ogranisa diferente proyecto / evento. Tambe hunto cu BUVO, Biblioteca Nacional Aruba / Mediadienst, ATA, TeleAruba, y AHATA, etc.

Prome cu Status Aparte, Aruba tabata conoce dos (2) Departamento di Cultura esta (ICA na nivel Insular y ‘Bureau Cultuur & Opvoeding’ riba nivel di Gobierno di Antiyas). Entrante 1 di januari 1986 a keda solamente Instituto di Cultura Aruba 

E unico parti cu den cierto forma a bin acerca di loke ICA ya caba tabata haciendo, tabata e personal religioso / ‘Eredienst’.

Manera ta conocí ICA tabata existi fo’i 1978 cu ta hopi prome cu Status Aparte, pues e entrada di Status Aparte na 1986 no a trece mas responsabilidad of tarea pa ICA.

 Insituto di Cultura Aruba sin duda ta un hecho y a ser acepta y reconoci pa Pueblo di Aruba.

Den su 25 aña di existencia, ICA sin duda a haci loke ta den su alcance pa conserva, promove y difundi nos Patrimonio, Tradicion y Cultura.

ICA indudabelmente ta un departamento relativamente hoben (e tempo ey 25 aña) y no por bisa cu ICA ya a logra su meta.

Tin un gran cantidad di tereno riba cual ICA ainda tin hopi trabou pa haci y ta di spera cu ICA den futuro lo por dispone di suficiente fondo pa realiza e tareanan cu ainda e tin cu enfrenta.

E tempo aya ya caba sr. Leo Tromp tabata bisa cu Instituto di Cultura Aruba mester tin un tarea importante pa e población multicultural cu a bini Aruba durante ultimo añanan.

Como país chikito, Aruba ta hopi vulnerabel na influencia di cultura otro cu no ta di nos Aruba ta conocí como un país hospitalario, pero Aruba mester ta consciente di su propio identidad, e ser Arubano como un bon Arubiano.

Aunke Aruba a habri man pa un cantidad grandi di stranhero establece nan mes, esaki no ta encera cu Aruba su identidad/cultura ta bay atras a costo di un cultura di otronan.

Aruba mester siña di su pasado: personanan di islanan Ingles cu a bini Aruba pa traha na Lago Oil & Transport Co. Ltd den añanan ’40, a forma nan propio “ghetto” na San Nicolas y casi no a integra den nos comunidad. Ta un parti di nan segundo generacion (esnan cu a keda Aruba) a integra. E diferencia di e tempo aya, ta cu e porcentage di persona cu a bini di exterior tabata relativamente chikito den comparacion cu nos poblacion. Den actualidad hopi ta e stranheronan cu a bini establece nan mes cu den añanan cuarenta.

Sr. Leo tabata di opinion cu ICA tin un tarea primordial den e aumento di stranhero riba nos isla cu kier establece nan mes na Aruba. Gobierno di Aruba mester exigi pa esnan cu ta ricibi permiso di estadia “integra” nan mes den nos comunidad y nos cultura. 

Si esaki no tuma luga, nos ‘cultura’ ta core un peliger grandi.

Mester mira otro alternativa pa cultura por haya mas fondo. Mescos cu deporte por dispone di fondonan di p.e. Lotto Aruba pa deporte. Gobierno mester destina cierto fondo pa cultura. El a duna algun ehempel e tempo aya cu si Lotto ricibi permiso pa pone machine di hunga placa na Aeropuerto, parti di ganashi mester ser destina pa cultura. Por introduci un cierto belasting riba cierto productonan, manera alcohol/sigaria of productonan di luho y destina un parti di e belasting na cultura. Kizas por hasta trata na cambia e estatutonan di Lotto y haci esaki p.e. Lotto pa Deporte y Cultura.

E tabatin vision y a trece dilanti cu ta necesario pa ICA specifica su necesidadnan pa loke ta personal cualifica y coordina esaki cu Departamento di Enseñansa. Ta necesario pa ICA p.e. tin un antropologo cultural den servicio, trahado social-cultural, profesionalnan / cu estudio académico riba diferente tereno (musica/teatro/arte visual). Mester motiva studiantenan pa sigui e estudionan aki y despues drenta den servicio di ICA.

Tin diferente actividadnan cu antes ICA tabata organiza cu tabata cay na agrado di pueblo Arubano, manera: Arte Popular na unda un cantidad di persona conhuntamente ta pone nan obra na exhibicion. Esaki alabes ta stimula creatividad di nos hendenan. No mester pensa solamente riba e pintornan reconoci. 

Por haci algo similar tambe den temporada di Pasco, unda ta exhibi solamente obranan cu tin di haci cu e ambiente ey.

Awendia nos por mira cu industria creativo ta den desaroyo.

E actividadnan cultural pa skolnan den Cas di Cultura of na e propio skol ta hopi importante pa e desaroyo di e hoben (‘Stichting Culturele Vorming in Schoolverband). ICA tabata organiza un cantidad di e eventonan aki antes.

Empleadonan di ICA mester ta disponible pa inciativanan cultural particular y duna un man unda ta necesario (p.e. Festival di Dande of di Canto, Musica, Danza, Teatro, etc.

Sr. Leo Tromp como Hefe di ICA a aporta, yuda desaroya, a presenta visionnan cu te awe nos por mira y aprecia. El a mustra na varios ocasion e tarea importante, pa ICA conoce su propio historia y comparti esaki cu nos comunidad Arubano.

  • Noticiacla ta desea bo un feliz Dia di Betico

    Noticiacla ta desea bo un feliz Dia di Betico

    ORANJESTAD – Awe Aruba ta recorda fecha natalicio di su yiu di tera porta mas conoci, Gilberto Francios ‘Betico’ Croes. Si e tabata na bida, awe e lo a cumpli 82 aña di edad. Docente di profesion, el a drenta politica na un edad hoben, y na caminda a funda e partido politico Movimiento Electoral di Pueblo (MEP). Responsabel e.o. pa inicia proceso pa Aruba haya su himno y bandera, y pa finalmente concretisa Status Aparte pa Aruba, el a fayece na 1986, e mesun aña cu Aruba a haya su status nobo. 

  • Aruba a registra 15 caso positivo di Covid19 awe

    Aruba a registra 15 caso positivo di Covid19 awe

    ORANJESTAD -  Segun resumen di awe 68 persona a recupera, a registra un total di 15 caso nobo di Covid-19, di cual 13 ta residente y 2 no-residente. Cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 452 test. 'Postivity rate' entre nos residentenan ta 14%.

  • Aruba a registra 55 caso nobo positivo di Covid19 awe

    Aruba a registra 55 caso nobo positivo di Covid19 awe

    ORANJESTAD -  Segun resumen di awe , a registra un total di 55 caso nobo di Covid-19, di cual 53 ta residente y 2 no-residente. 74 persona a recupera.

  • Crisis Team: Aruba ta registra 4 morto relaciona cu Covid19 den un siman

    Crisis Team: Aruba ta registra 4 morto relaciona cu Covid19 den un siman

    ORANJESTAD  – Covid-19 Crisis team di Gobierno manera informa anteriormente, a bisa cu awe a keda registra 4 persona cu a fayece na hospital di Covid-19 corona virus durante di un siman. Dos di e personanan a fayece ayera 21 di Januari y e otro dos personan a fayece dia 17 di Januari. E procedura pa registra e fayecidonan segun e protocol a haci cu awe por a anuncia e fayecidonan cu dos caso cu ta retrasa. E edad promedio di e fayecidonan ta di 77 aña.  Crisis Team y Gobierno di Aruba ta extende palabranan di profundo condolencia na e famianan. Un advertencia di parti di Crisis Team ta bay na un y tur den nos comunidad, cu e mihor manera pa salba bida di bo famia, amistad y di bo mes ta mediante, distanciamento social, evita lugarnan cu hopi hende, uza tapaboca tur momento, aplica higiena di man regularmente, boost bo defensa comiendo hopi berdura y fruta y tuma bo vitamina C, D y Zink segun bo necesidad y bebe bo remedinan segun indicacion den caso di malesanan cronico. Dentro di poco Aruba lo ricibi vacuna contra Covid y nos comunidad henter lo por ricibi e proteccion cu nos mester.

  • No lo tin sorteo di Lotto dialuna 25 di januari

    No lo tin sorteo di Lotto dialuna 25 di januari

    (ADVERTORIAL)

  • Aruba ta raporta 4 morto di Covid19 y 30 caso positivo nobo awe

    Aruba ta raporta 4 morto di Covid19 y 30 caso positivo nobo awe

    ORANJESTAD -Aruba ta raporta un cantidad di 4 morto awe di Covid19 y 30 caso positivo nobo. Tin pa informa cu e 4 fayecidonan cu a keda regista awe, 2 a fayece ayera y 2 DVG su seccion di Epidemiologie a wordo informa di nan cu retraso. Por remarca si cu tur tawata interna den hospital pa extra cuido. Edad promedio di esnan cu a fayece cu of di covid-19 ta 77 aña. Segun resumen di awe  85 persona a recupera, a registra un total di 30 caso nobo di Covid-19, di cual tur ta residente. Cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 560 test. 'Postivity rate' entre nos residentenan ta 13%.

  • Powered by SETAR