Gobierno lo conmemora Dia di Betico den un forma modera

ORANJESTAD – Gobierno di Aruba lo conmemora Dia di Betico  (25 di januari) e aña aki den un forma adapta. Asina minister di Cultura Xiomara Maduro a confirma den forma di primicia pa e portal aki diabierna atardi. Mas prome, e mandatario a reuni cu e commission responsabel primordialmente pa e acto protocolario y e manifestacion cultural. Ainda no ta cla ki regla lo tin pa actividadnan publico manera celebracion den barrio. E adaptacion ta bin logicamente debi na e situacion di COVID19. 

E SITUACION 

Segun e mandatario, e situacion enberdad ta uno fastioso, primordialmente pa loke ta aglomeracion di hende, y gobierno no kier fomenta esaki tampoco. “Gobierno mes no ta bay organisa algo cu tin aglomeracion. Pero si nos no por keda sin conmemora e fecha importante aki” e mandatario a sigui bisa. Como tal e planificacion ta cu tanto e acto protocolario como e manifestacion cultural lo tuma lugar di un forma virtual. 

MENOS HENDE

Mientras cu e ta un acto virtual, lo tin hende si, pero hopi limita. E mandatario ta papia di solamente gobernantenan y algun miembro di famia di Betico Croes. E cantidad exacto di persona ainda tin cu delibera ainda cu e Crisis Team segun e mandatario. E actonan lo tuma lugar na e lugarnan di custumber, pero sin publico. E intencion ta pa motiva tur hende pa wak e na television of otro Plataforma visual. Esaki ta conta tambe pa e manifestacion cultural.

CELEBRACION ROND DI ARUBA

E celebracionan publico rond di Aruba, manera den barrio y otro tipo di actividad publico, no a deliña ainda kico exactamente lo haci. E mandatario di Cultura a sigura cu dentro di poco durante un conferencia di prensa lo duna mas informacion riba e parti ey tambe, ya cu e reunion di awe diabierna, a toca solamente e parti protocolario y manifestacion cultural. Pero e mandatario ta pensa cu e lo ta un extension di e maneho cu gobierno a hiba aña pasa, ora cu e crisis a anuncia, esta cu gobierno no ta aporta pa tin aglomeracion di hende. Mientrastanto a bin regla y protocol stipula pa Crisis Team y DVG cu ta pone cu aworaki tin un maneho mas conoci y structura. Pero relaciona cu e casonan cu a subi ultimo momento aki, e mandatario ta sigui bisa, ta bay keda usa e maneho di aña pasa mes, cu ta cu gobierno mes no ta bay organisa eventonan publico di celebracion. “Nos ta den evaluacion un rato si cu e Crisis Team pa wak kico ta bira e parti final pa e acto protocolario y manifestacion cultural.