Reunion riba ‘hedging’ no a bay sin problema entre Lopez y Wever

ORANJESTAD – E reunion pidi pa fraccion di MEP den parlamento pa trata e asunto di tarifa di awa y coriente a tuma lugar awe manera anuncia, aunke no manera a spera. De hecho, e partido cu a pidi e reunion (MEP), na comienso a pidi pa par’e y schors e, pa motibo di falta di informacion. E reunion sinembargo a sigui, pa despues schors e te proximo aviso. E desaroyo aki a crea un ‘polemica’ pa e partido heel, cu ta acusa e presidente di parlamento di no a actua corecto. E presidente na su turno ta mustra cu e la actua segun ley di parlamento.

LIDER DI MEP NO TA CONTENTO

Riba su pagina di facebook, e lider di fraccion a mustra awe su descontento y a bisa; “@ Parlamento, tratando pa di 6 biaha di conbense presidente di parlamento pa schors e reunion tocante WEB pa 2 siman pa nos haya e hedging agreement y handling fee agreement, manera minister de Meza mes a indica. Pero e presidente di parlamento ta asina insigur di su mes, asina frustra, cu e no por eherce su funcion na forma imparcial. Djis pasobra MEP a pidi schorsing e mester nenga MEP. Na final e mester a sucumbi y schors e reunion toch na final di prome tanda. Aruba merece mihor. Aruba merece un presidente di parlamento cu sa su trabou y no ta asina amarga!”

KICO A SOSODE?

Presidente di Parlamento Marisol Lopez, a splica NoticiaCla.com awe sinembargo, cu cos no a bay manera cu sra Wever ta pretende. Lopez ta admiti cu e reunion a wordo pidi dia 12 di januari cu urgencia, y a pidi e hedging agreement y tambe e handling fee di Valero. “Mi a manda pidi e minister (de Meza) e documentonan ey, y te cu ora e reunion a cuminsa, e documentonan no a wordo ricibi ainda”.

A ACTUA SEGUN LEY

Segun Lopez, ora cu e reunion a cuminsa, Wever Croes a pidi pa no sigui cu e reunion mes.(Lesa aki e carta cu a manda pa para e reunion pidi) “Su proposicion tabata pa para e reunion por completo y sigui ‘e otro dia te ora e haya e documentonan cu e la pidi” Lopez ta sigui bisa. Pero segun e presidente di Parlamento, reglamento di orden articulo 34, ta bisa cu ora un miembro di parlamento stop un reunion, su proposicion di schorsing mester wordo sosteni pa por lo menos dos otro miembro den Staten. “E ora mi a puntra den sala, si e otronan ta bay di acuerdo cu e proposicion di sra Wever pa stop e reunion”. Democracia Real su representante (Andin Bikker) a bisa cu no kier para e reunion y AVP su miembronan tampoco. Nan kier a sigui pa haci nan pregunta y tin algun inquietud. No obstante e hecho cu no tin documento, nan tabata dispuesto pa sigui. Como tal , como cu mayoria tabata kier pa e sigui, Lopez a dicidi pa sigui cu e reunion. “No ta asina manera sra Wever Croes ta publica, cu ami mi so riba mi mes a dicidi si ta sigui of e ta para. Mi a bay segun e reglanan cu tin” Lopez a bisa. Mes momento e la bisa si, cu e por, riba su mes pa schors e reunion, pero no a haci esaki riba su mes, sino pa e motibonan ya splica.

MINISTER DE MEZA

E minister encarga cu e caso, a splica durante e reunion, cu e la manda pidi e documentonan necesario na WEB y ta den espera pa ricibi esaki. Tambe e la mustra cu tin un asina yama ‘feiten onderzoek’ andando, pa cual e la duna un splicacion completo.

CONTESTANAN DUNA

E mandatario a duna contesta riba gran parti di e preguntanan haci durante e prome tanda, segun Lopez a bisa NoticiaCla.com. Remarcable segun Lopez, ta cu Wever, cu a pidi e reunion, no tabata presente den e tanda ey y a bandona sala. Den e caso aki e reunion a continua y a sigui te final di e prome tanda. Despues Lopez a dicidi pa pospone esaki te proximo aviso. No ta conoci ki tempo esaki lo tin. Ta spera cu ora cu e documentonan drenta, cu e lo por tin mas informacion.

PROCEDURA PARLAMENTARIO

Un nota adicional cu Lopez a splica, ta cu segun Wever Croes, fraccion di MEP a pidi e reunion cu urgencia. Esaki ta berdad segun Lopez, pero den parlamento, no conoce e concepto di fraccion. Pues ley ta reconoce e parlamentario independiente. Pues ora cu pidi na nomber di fraccion, ley no ta sostene esaki. “Como tal, na momento cu sra Wever a bisa cu su fraccion ta yama reunion y kier pare, bo no por haci esey asina” Lopez a bisa. E procedura como tal, segun Lopez, lo tabata mescos pa cualkier parlamentario cu a pidi un reunion. Foto cortesia ArubaAriba.com