Hulanda: No ta rekeri PCR test negativo mas pa biaheronan for di Corsou

WILLEMSTAD/DEN HAAG – Debi cu e cifranan di casonan positivo a cuminsa baha, Hulanda a adapta su maneho pa biahamento pa Corsou diabierna. Mientras cu e code ta keda oraño, a elimina e rekisito pa tin un PCR test negativo den poder ora di biahe. Te cu ayera, tabata necesario (no tabata conta pa Aruba y Bonaire) pa tur hende cu biaha di Corsou pa Hulanda, presenta un PCR test negativo. Esey a keda cancela entrante awe. Ademas e persona cu biaha pa Hulanda, na su yegada no mester bay den cuarentena residencial tampoco. E color si ta keda oraño, cu ta nifica buelonan esencial so.