No ta cuestion si e ta bin, sino ki ora Aruba ta drenta e di tres ola di COVID19

ORANJESTAD – No ta cuestion si nos ta haya un di tres ola di COVID19, sino ki ora. Asina miembro di e Crisis Team di COVID19 sra Sharline Koolman-Wever a sigura e portal aki diaranson anochi durante un briefing riba e virus. Sra Koolman ta considera e casonan actual como resultado di actonan prome cu pasco, hacimento di compras, (aglomeracion den tienda), y tambe temporada di Sinterklaas. Y si awor caba e ta halto, por spera cu ainda cu falta e efecto di Pasco y Aña Nobo cu tin cu bin ainda. Segun Sra Koolman, e ta spera cu e ta robez, pero lamentablemente tur señal ta mustra den e direccion ey. Y mirando con cos ta bayendo, ta premira cu aki un pa dos siman, nos por bisa cu nos ta den e di tres ola di e pandemia aki. 

CANTIDAD HALTO

For di varios dia caba a cuminsa nota un aumento di caso atrobe, unda cu laboratorionan ta anuncia e aumento drastico aki di caso. Ademas lugarnan manera Medwork cu ta raporta casonan laboral di malesa (AO) a cuminsa raporta un aumento grandi di hendenan cu ta raporta malo (AO). Tur esaki ta indicacionan cu e situacion ta serio y cu lamentablemente e situacion lo sigui asina por lo pronto. Ta spera un trend pa por lo menos dos pa tres siman mas, prome cu esaki cuminsa ‘normalisa’ atrobe. Parti di e indicacion ta e asina yama ‘positivity rate’ cu ta e indice di hende cu ta test versus e cantidad cu ta sali positivo di e test aki. Normalmente esaki mester ta den careda di 5% of menos, y esaki a subi bay te riba 30% atrobe.