Tjon-Kock: Polis ta autorisa pa enforsa medidanan ‘re’ introduci contra COVID19

ORANJESTAD -  Polis lo actua cu man mas duro ainda durante e proximo simanan pa asina enforsa e reglanan cu a keda stipula pa bringa COVID19. Alto comisario di polis Vanessa Tjon Kock diaranson anochi a splica motibonan pakico cierto medida legal a keda (re) introduci y con exactamente mester compronde nan ehecucion y consecuencia di esey. Un di e motibonan principal ta resistencia di individuonan ora cu polis kier y mester actua. “Polis awor lo actua na full un otro manera” e hefe maximo di polis a bisa. 

GEBIEDSVERBOD

Entre otro medida re introduci, ta e asina yama gebiedsverbod cu ta nifica cu na cierto partinan manera parkeerplaats publico y beach, bo no por ta presente, y esaki ta mara na un orario stipula. Den e caso aki te cu dia 31 di januari, (entrante awe dia 7 di januari) esaki ta 7pm te ora cu e Toque de Queda vence tur anochi. “E momento cu ta 7’or di anochi, polis lo ta autorisa pa nos solamente core tur loke ta publico publico pero si delitonan penal wordo cometi, tambe e momento ey polis lo por actua a base di lik op stuk”. 

TA PROHIBI ACTIVIDAD MUSICAL SOCIAL

A splica tambe e parti di actividadnan social mirando e situacion actual. Un medida como tal ta cu no ta permiti pa organisa ningun actividad social musical, ni di carnaval ni ningun otro manera pa cu e establecimento. E ta conta pa establecimento y tambe cas. Esaki ta evita aglomeracion, mirando cu publico ta wordo atrae pa musica unda nan kier ta hunto, segun sra Tjon-Kock. Ta permiti background music, pero no por propaganda ni organisa actividadnan social cu ta temporada di carnaval. 

LIMITACION DI HENDE RIBA BOTO

Tambe tin medida riba laman unda cu ta permiti un cantidad limita di persona riba boto. Aki ta limita 4 persona so riba un boto of yate. No ta permiti ningun fiesta of actividad social of musical riba boto. 

TA REDUCI SAMENSCHOLINGSVERBOD NA 2 PERSONA

Samenscholings verbod ta wordo reduci na 2 persona maximo riba caminda publico of parkeerplaats publico.