SIAD: Comerciantenan no ta cobrando clientenan BAZV corecto

ORANJESTAD – Casi 7 siman despues cu gobierno a introduci e impuesto nobo conoci como BAZV, ainda gran parti di comerciantenan no ta cobrando esaki bon. De hecho, ta resulta cu practicamente mayoria ta cobrando esaki fout. Como tal un biaha mas awe departamento di impuesto mester a presenta muestranan di con si, tin cu cobra esaki corectamente. A resulta tambe cu te hasta companianan grandi estatal, no ta cobrando esaki corecto y ta haci como si fuera ta e comunidad tin cu paga e BAZV riba e producto of servicio cu nan cumpra. Algo cu sigur no ta corecto segun inspector di belasting Angeline Geerman-Giel a splica awe mainta.

KICO SI POR HACI

Geerman a splica awe mainta cu e comerciante mag dicidi si e ta cambia su prijs (baha, aumenta of laga prijs mescos) “E ta un escogencia y decision di e comerciante si e ta bay hinca BAZV den su prijs. Kiermen comerciante den su administracion interno mag hinca BAZV den su prijs pero e no ta obligatorio” Geerman a bisa. E problema ta cu ora cu un comerciante presenta e recibo, e loke ta aparece ariba, mayoria biaha ta fout (mira aki un ehempel di un fout) . “Riba e recibo comerciante mester mustra un solo prijs” Geerman ta sigui bisa. (mira aki e forma corecto con pa pone riba recibo). “Ley ta stipula cu e comerciante ta esun cu tin cu paga BAZV y no su clientenan. Cu e consumidor no ta accepta e prijs, ta un disputa den ley civil. Esaki ta bira un disputa entre e comerciante y su cliente. Den esaki Departamento di Impuesto no tin participacion” Geerman a sigui splica.

FOUTNAN COMETI

Segun Geerman, no ta consehabel pa pone un specificacion di prijs riba e recibo of factura. Esaki pasobra specificacion ta crea espacio pa fout, e suma calcula di BBO/BAZV no ta corecto, e por causa cu comerciante ta haci declaracion fout, e por causa un eventual coreccion di ‘omzet’ pa comerciante - por causa cobransa adicional (naheffingsaanslag) inclui boet pa e comerciante. Tambe pasobra e specificacion ta mustra cu ta e cliente di comerciante (consumidor) ta suheto pa paga BBO/BAZV y esey no ta corecto. Ta e comerciante ta esun cu directamente tin cu paga BBO y BAZV, y no e cliente. Den e simanan cu ta sigui, departamento di impuesto lo sigui duna mas informacion di kico exactamente e companianan y comerciantenan mester haci.