Knops riba carta di ABV: Trahadornan mester sigui solidario cu esnan cu a perde nan entrada

ORANJESTAD – Mientras cu e secretario di estado Hulandes Raymond Knops no a tuma nota di e carta habri dirigi na dje di sindicato ABV, (segun e la bisa e portal aki:red), no tin indicacion cu e loke cu ABV ta pidi, ta possible, y a bisa mas bien cu tur hende, incluyendo e grupo di sector medico, mester ta solidario pa cu esnan cu a perde tur cos. Asina por conclui di e contesta di e mandatario Hulandes. E tabata un di e preguntanan di e portal aki diaranson atardi durante un conferencia di prensa di e mandatario na final di su bishita na Aruba. 

CARTA HABRI

Manera ta conoci, e sindicato cu ta representa gran parti di trahadonan di nos hospital y den cuido medico en general, a manda un carta habri pa e mandatario, pa hala su atencion riba e cortamento di salario (5% como parti di e reduccion di 5 miyon mensual pa AZV). ABV no a haya un cita cu e mandatario durante su bishita y como tal a opta pa manda un carta habri. Lamentablemente e mandatario no a ricibi e carta aki. 

REACCION DI KNOPS

Asina mes, e mandatario a mustra cu e situacion ta supremamente serio na Aruba relacion cu COVID19, y cu e debe di nos isla a aumenta drasticamente. E mandatario a compara su bishita cu hendenan cu a bise cu nan a perde full nan entrada, contra esun di esnan cu tin entrada ainda, manera miembronan di ABV. E mandatario a referi na e solidaridad di esnan cu si tin salario ainda, pa entrega pa asina esnan cu no tin nada mas, por haya algo tambe y asina yuda e situacion. “Aworaki tur hende mester yuda!” e mandatario a bisa. “Mas lihe e crisis aki keda soluciona, mas lihe e resistencia ta crece pa bringa e problema financiero y por tin miho perspectiva, hasta pa e grupo di persona cu bo ta referi na dje (trahadonan den sector medico:red), specificamente esnan den cuido, riba cual nos a papia tambe”. “Mi a tende hopi bon tambe di e señalnan cu a bin for di direccion di hospital unda cu ta papia hopi di e beneficio di traha hunto, kico e menasa y inseguridadnan ta” e mandatario a sigui bisa. “E situacion ta serio” Knops a finalisa bisando. No a sinti di e mandatario cu e lo por haci mucho of duna oido specifico na e peticion di e sindicato riba nan peticion.