Aruba no a dicidi ainda si ta haci paspoort digital pa COVID19 uno obligatorio

ORANJESTAD – Gobierno di Aruba no a dicidi ainda si e paspoort di salud manera presenta recientemente, lo bira obligatorio pa tur hende cu drenta Aruba. Esaki pasobra e por bira un ‘drempel’ pa turistanan bishita nos isla. E paspoort ta un instrumento cu Aruba a uni cu ne como e pais pionero segun e mandatario, y mester compare cu e buki geel di antes pa p.e. gele koorts. Paisnan ta exigi esaki di un persona ora cu biaha, y den e caso aki, esaki lo bira algo similar pero di forma digital. Riba pregunta di noticiacla, e mandatario a bisa cu lo tin cu dicidi ainda si ta haci esaki obligatorio pa tur hende cu drenta Aruba. E intencion ta pa cuminsa usa esaki entrante maart 2021 y pa e momento ey mester tin un decision tuma pa Aruba, segun e mandatario. Por lo menos, e mester ta cla pa uso. Merca y varios aeroliña a dicidi caba cu nan ta bay pone esaki como exigencia pa drenta nan pais y subi e avion en cuestion.