Wever: En bes di insulta otro, cumpli cu regla contra COVID19

ORANJESTAD – Nos mester cumpli cu e reglanan pa evita plamamento di COVID19 en bes di culpa y insulta otro di ken a pega ken. Esey tabata un mensahe di prome minister Evelyn Wever Croes diamars anochi, relaciona cu e aumento drastico atrobe di casonan pa dia. Manera ta conoci e cantidad di dia a subi te 110 diamars. Aki a cuminsa critica y insulto di hende contra otro pasobra ta culpa otro di no cuida, cu a pone cu nos ta den e situacion aki. Algo cu e mandatario no a aprecia. E insultonan ta bin e.o. debi cu ta premira cu awor lo bin mas medida atrobe cu ta stroba e operacion commercial di Aruba. 

SITUACION

Segun e prome mandatario, e berdad ta cu casonan di COVID19 ta halto atrobe, y claro, nos ta preocupa. “Pero culpa otro, insulta otro, exigi cu medida mester conta pa otro so, y no pa otro, no ta yuda ningun hende cu nada” e mandatario ta bisa. “Nos ta un pueblo culto y educa, nos a pasa den esaki caba, y nos a logra. Ban hasi’e atrobe” e mandatario a sigui bisa. Aki e ta mustra cu nos tur sa kico nos mester haci. “ Pa frena e plamamento, nos tur mester limita nos movecionnan y nos mester cuida nos mes y nos famia hopi mas ainda. Aruba, nos por! Bo sa dicon? Pasobra nos ta stima nos mes, nos ta stima nos famia y nos ta stima Aruba”, e mandatario a finalisa bisando den un mensahe cu el a plama via rednan social.