Gobierno di Reino lo no pidi Raad van State pa conseho riba presupuesto di Aruba

DEN HAAG/ORANJESTAD – Gobierno di Reino lo no pidi Raad van State conseho riba e situacion di presupuesto, manera cu miembronan di Tweede Kamer a pidi e siman aki. Vocero di minister Plasterk a confirma esaki na NoticiaCla diahuebs mainta riba e pregunta cu si e gabinete lo haci e peticion aki y e contesta tabata ‘No!”. Cu esaki nan ta rechasa e demanda di miembronan di Tweede Kamer cu a exigi di e gobierno hulandes pa nan haya un conseho di e organo menciona. Nan a confirma e noticia di NoticiaCla tambe cu gabinete Rutte a pidi pa acelera e rapport di CFT y bin cu un asina yama ‘quickscan’. “E rapport aki ta wordo spera dentro di algun dia.

Riba e hecho cu gobierno di Aruba a ordena su departamentonan pa no coopera cu e comision di CFT pa e por haya su investigacion, e contesta tabata solamente ‘ Nos ta djies warda e resultado di e College Financieel Toezicht’. Manera cu NoticiaCla a raporta diaranson, vocero di Plasterk a confirma cu e comision a cuminsa traha for di momento cu e KB a drenta na vigor, cu ta diaranson. Diamars sinembargo nan tabatin nan prome reunion di conocemento, pa diaranson nan inicia cu nan labor. Sinembargo hopi lihe nan a nota cu nan a haya resistencia di parti di e departamentonan di gobierno.