HTC ta prome partido politico cu a presenta nan programa di campaña pa eleccion 2021

ORANJESTAD - E partido Hubentud Treciendo Cambio (HTC) dialuna a bira e prome partido politico registra cu a publica nan programa di partido. Un programa extenso di 12 pagina conteniendo no menos cu 65 punto. Algun di nan ta un frase, mientras cu otronan ta mas elabora. Rapidamente ora cu e programa a bira conoci, hopi a cuminsa ridiculisa esaki, ya cu e ta contene puntonan hopi ambicioso, y tin biaha hasta chistoso. Asina mes, e ta keda nan programa di partido y e hecho ta cu nan ta keda e prome partido pa entrega un programa di partido. 

REPASANDO E PROGRAMA

Repasando e programa, loke ta hala atencion ta algun punto principal. Entre nan, e forma con por bay controla tur hende via un carnet cu chip cu GPS, estilo big brother. Ta bisa cu esaki por wordo usa solamente cu aprobacion di huez den caso cu tin un crimen cometi. Pero e realidad ta cu e ta tuma privacidad di tur ciudadano y ta mete cu su libertad di movecion. Varios punto ta regarda asuntonan financiero unda cu e ta mustra beneficioso pa e ambtenaar, studiante, y te hasta sector priva pero no ta specifica con ta bay financia esaki. Aumento salarial, pensioen, subsidio di gasto di subsidio, reduccion di varios aspecto di servicio y mas. Atrobe, sin duna splicacion con lo financia e aspectonan aki. 

PUNTONAN VALIDO

E programa tin hopi puntonan valido tambe, pero ambicioso y pa netamente e motibo ey, nunca ningun partido a logra (ainda) pa implementa esaki. Edificio nobo pa KIA y Warda Nos Costa, computer den tur auto di polis, Free Wifi pa henter e isla. Otronan ta simplemente fantasia, den e forma cu e ta wordo presenta, y atrobe ta carece di mas splicacion con pa yega na dje. Creatividad ta halto den e partido aki, y cu esaki nan a logra bin cu 65 punto di partido, di cual algun ta mustra hopi bon, y otronan ta mustra algo di hilaridad y pertenece na siglo 22. Pero, manera tur partido, mester duna nan beneficio di duda, y wak con nan lo bende esaki cu pueblo pa wak si pueblo por duna nan e confiansa necesario pa nan por drenta Parlamento y yuda goberna e isla aki. Wak e programa completo AKI