Aunke introduci visa otro siman, frontera entre Aruba y Venezuela ta keda cera!

ORANJESTAD - Aunke cu ta bin un visa obligatorio pa Venezolanonan drenta Aruba entrante 15 di januari proximo, e frontera entre Venezuela cu Aruba ta keda cera. Asina prome minister Evelyn Wever Croes a bisa noticiacla dialuna mainta. Segun e prome mandatario, e frontera entre Venezuela y Aruba ta cera pa otro motibonan y no pa visa. E motibonan ta bay bek prome cu COVID19. Mientrastanto noticiacla a haya e confirmacion cu e visa ta keda introduci pa 15 di januari proximo. 

PROCESO ANDANDO

E apertura di e frontera a base di esey, ta un proceso cu ta andando. "Y mi no sa si nos ta bay yega na e punto pa habrie" e mandatario a sigui bisa. "Si visa keda cla mes, no kier men cu 16 di januari tin avion cu buelonan directo ta bin for di Venezuela. Por ta si cu un persona residencia na Venezuela lo kier bin Aruba via Panama, Colombia etc, y den e caso ey, e rekisito di visa lo ta aplicabel" e mandatario a finalisa bisando. 

E VISAOra cu e mandatario a duna e comentario, e informacion ainda no tabata oficial (cu ta comprendibel), y a keda di busca mas detaye. Pero despues a haya e confirmacion via Directie Buitenlandse Betrekking, cu a presenta e staatscourant oficial di dia 24 di december 2020 ,cu ta haci anuncio di e decision cu a keda firma dia 9 di december ultimo cu Rey Willem Alexander a firma. E intencion ta cu proximamente lo presenta e detaye di e situacion di e visa y e rekisitonan publicamente na papiamento.