Minister Bermudez ta sigura cu problemanan di douane lo haya solucion

ORANJESTAD – Posiblemente pa motibo di mal comunicacion y algun cu lo por a perde pasenshi, ta pone cu awe duaneronan a pone trabou abou awe mainta. Segun e minister encarga cu douane, esta Angel Bermudez, nan (douane) ta den un situacion precario. Un situacion cu e la bin encontra, y cu e ta lamenta. E mandatario a papia cu NoticiaCla.com merdia riba e situacion, y a sigura cu e tin atencion pa nan. Esaki pasobra nan ta un di e basenan principal cu ta genera entrada pa e presupuesto di Aruba. “E ta manera un auto. Bo motor mester core bon pa bo por yega caminda bo kier yega” Bermudez a bisa. Como tal e duaneronan mester haya loke nan mester pa nan por funciona debidamente. Entre loke nan mester, Bermudez ta referi na e ekiponan cu douane mester, nan ubicacion y nan posicion huridico. Tur ta puntonan pa cual awe nan a bay den accion. 

KICO TA E PROBLEMA

Cosnan cu a bay malo segun e mandatario ta debi na entre otro, austeridad, negligencia y otro posibel cosnan. “Ami ta responsabel awor pa drecha e situacionnan ey. Mi a bisa nan esey tambe y mi a compromete mi mes cu esey. Mi interes ta cu douane mester funciona debidamente” Bermudez a sigui bisa. Tin retraso y tin cosnan cu enberdad tin cu wordo drecha segun e mandatario. “Mi ta conciente di esey y mi ta trahando riba dje” Bermudez a bisa.

TRAHANDO RIBA PROBLEMANAN

Pa loke ta e problema di ‘huisvesting’ tin un comision nombra cu ta buscando solucion pa sali for di e edificio bieu y pa tambe construi nan edificio nobo na waf na Barcadera. Tambe nan ubicacion na aeropuerto mester bin cierto cambio. E comision ey ta trahndo cune. Tambe e minister a papia cu ta reclutando un director nobo. Esey ta wordo haci pa oficina di Deloitte. “Prome cu fin di luna mi ta haya un rapport final cu nan recomendacion di e candidatanan”. E rechtspositie di e duaneronan tambe ta pega. Tin un hala di hende cu mester wordo promovi. “Ta un tiki bergonsoso cu nos ta laat cu nan. Ora cu un hende celebra cu e la traha 25 pa 30 aña, bo mester ta un tiki mas atento pe y pa e cosnan ey ta regla na tempo” e mandatario a sigui bisa. Tur ta cosnan cu ta trahando ariba ultimo lunanan.

PROBLEMA DI COMUNICACION

E hecho cu ultimo añanan no tin un director fiho, sino un management team (y un director cu ta bin dos dia pa siman ya cu e ta traha na Corsou), ta pone cu no tin debido atencion for di Aruba pa e operacion diario. Ey tin tambe e problema di comunicacion. “Tanten cu nan ta wordo informacion y cu nan ta weita tambe cu e aspectonan ta wordo atendi, (aunke cu ta dura tempo), nan ta keda toch cu e consentimento cu tin atencion pa nan. Hendenan mester haya e indicacion cu doño di trabou ta acudi cu nan problematico nan y cu tin atencion pa nan” Bermudez a sigui bisa.

REUNION CU SADA

E mandatario a programa un reunion pa awe 3’or cu e sindicato unda cu mayoria di e asuntonan lo mester a wordo atendi. No ta conoci con e reunion aki a concuri pero cu despues di e reunion ey, cosnan lo a trankilisa den cuerpo di douane. E foto ta di e accion di awe mainta dilanti bestuurskantoor.