Crisis Team: No ta descarta aumento drastico di casonan di COVID19 na Aruba

ORANJESTAD - Crisis Team no ta descarta aumento drastico den casonan COVID19. Den e relato awe di Crisis Team riba COVID19, nan ta mustra cu den e siman cu a transcuri por a tuma nota cu e casonan positivo y e 'positivity rate' ta aumentando den un forma stabil. "Esaki ta indica cu plamamento di e virus ta tumando luga riba base regular y no ta descarta cu mirando e cantidad di fiestanan, aglomeracion y celebracion cu a tuma lugar den e dianan cu a pasa Aruba lo por bay mira un aumento drastico den cantidad di casonan". Asina e comunicado di Crisis Team ta bisa textualmente. 

RECOMENDACION

E recomendacion pa stop e plamamento di e virus ta keda igual. Si bo tin sintoma evita contacto cu tur persona y tuma contacto cu bo dokter di cas pa por haci un test. Evita espacionan y lugarnan cu tin hopi persona (aglomeracion). Mantene distancia di 1.5 meter di distancia di otro persona y den tur espacio interior uza tapa boca. Mantene un bon higiena di man labando esaki regularmento of uza handsanitizer. 

PLAMANDO VIRUS

Un persona por tin e virus y por ta plamando esaki sin cu e mes tin sintoma ainda of porta su sintomanan ta hopi leve. Esaki te motibo pakiko bo tin pa proteha bo mes y alavez proteha otro persona na tur instante.