Encuesta: Mayoria ta sostene medidanan nobo contra COVID19

ORANJESTAD - Mayoria di esnan cu a participa den e encuesta di noticiacla riba e medidanan contra COVID19, ta positivo pa e decision pa re-introduci Toque de Queda durante dianan di fiesta. Durante 24 ora largo usuarionan di Noticiacla.com por a participa y comparti nan pensamento riba particularmente e aspecto aki di e 4 medidanan re-introduci e siman aki. Interesante ta cu e districto cu mas a resisti e cambionan ta Oranjestad , mientras cu Sta Cruz ta esun cu mas a aprecia e medidanan aki. Den edad, esnan di edad mas halto a aprecia e medida, y esnan entre esnan di menos edad (18-24 aña) tabatin un empate. 

E DETAYENAN

Manera indica caba, mayoria di esnan cu a participa (72%) ta pro e medidanan contra 28% cu no ta aprecia e medidanan of no ta haya nan bon pa un of otro motibo. Entre esnan cu a haye bon, e opcion 'E ta evita di plama e virus' a score mas halto cu 40%.   Entre esnan cu no a aprecia e medidanan tambe tabatin opcion. E opcion cu mas esnan cu no a aprecia e medida, ta cu 'e virus no ta tene cuenta cu Toque de Queda (40% di esnan cu a bisa no) pues no ta wak e sentido pa tin un Toque de Queda. Un opcion cu tambe tabata 'popular' entre esnan cu a vota contra, tabata e opcion 'no mester adapta e orario pa cambio di tiro (pues cu e TQD ta cuminsa 2am envez di 11 pm e dia prome), cu tabata 27%. Un otro grupo, (16%) ta haya cu e orario di TdQ mester ta mas largo, y pesey nan no ta di acuerdo cu e medida, debi na e orario cortico, ya cu e no tin sentido. Esun menos cu a haya sosten di e opcionnan tabata 'e ta stroba nos di celebra aña nobo (16%).

DISTRICTO

Loke ta interesante tambe ta semper con e districtonan ta diferencia di otro. Y esaki por tin varios motibo. E biaha aki, Oranjestad y Noord (esnan cu a participa den e encuesta aki por lo menos) a resisti mas pa e medidanan. E grupo mas grandi di esnan cu ta contra tabata Oranjestad cu 34%, y esun cu menos tabata contra tabata Sta Cruz cu 19%. Consecuentemente esun cu mas a sostene e medida tabata Sta Cruz cu 81%, contra Oranjestad cu tabata 66%.

E ENCUESTA

E encuesta a dura 24 ora y esnan di edad 45-54 aña tabata mas activo, y mas homber (51%) a participa, compara cu hende muher. Y Oranjestad tabata mas activo (25%) compara cu San Nicolas (8%). Un total di 702 persona a participa na e encuesta aki. Noticiacla no ta pretende cu esaki ta un encuesta cientifico ni representativo di e isla, pero si e ta  sigur uno interesante pa interpreta.