Aruba ta cancela Travel Bubble cu Bonaire for di otro siman!

ORANJESTAD / KRALENDIJK – Crisis Team Covid -19 a informa diahuebs cu entrante dia 5 di januari 2021, biaheronan lo mester realisa un COVID-19 test pa por drenta Aruba biniendo for di Bonaire. E test aki por wordo haci dentro di 72 ora prome cu e biahe of ora di yegada na aeropuerto di Aruba, manera ta e caso cu pasaheronan cu ta yega nos isla for di cualkier otro destinacion. 

SORPRENDI

E prome mandatario di Bonaire esta Gezaghebber Edison Rijna mes a keda sorprendi cu e informacion. " E noticia di Aruba ta sorpresa pa mi. E situacion na Bonaire no. Nos a verwacht e aumento aki i te ahinda tin e situacion bow di control" e mandatario a bisa noticiacla diahuebs atardi como reaccion breve

NO TA EXONERA MAS

Te ainda biaheronan for di Bonaire tabata wordo exonera pa haci e test, pa motibo di e asina yama “Travel Bubble” entre e dos islanan. Sinembargo entrante dia 5 di januari 2021 esaki lo no ta aplicabel mas. Pasaheronan ta wordo pidi pa tuma bon nota di e cambio aki. Un di e posibel motibonan ta cu e cantidad di casonan tambe ta aumentando riba e isla di Flamingo, aunke cu gezaghebber mes ta bisa di a spera esaki y no ta sorpendi. Awe so a test 7 positivo, cu pa e isla, ta hopi.