Lider di partido MFK ta desmenti envolvimento den acontecimento na Hato

WILLEMSTAD - Directiva di Movemento Futuro Kòrsou (MFK) a tuma nota di e acontecimento na aeropuerto caminda dos miembro di LBD tabata envolvi. Den reunion semanal di directiva di MFK, e punto aki a wordu atende i directiva di MFK ta haña cu ta na su luga pa reacciona riba e asunto aki. Aki nan a mustra cu lider politico di MFK - Gerrit Fransisco Schotte no tin nada di aber cu e asunto aki.

Segun Schotte, riba instruccion di minister di husticia, cuerpo policial a asigna algun miembro di e cuerpo di LBD como “persoonsbeveiliging” na diferente parlamentario i den e caso aki tambe na lider politico di MFK for di 6 di mei 2013. E miembronan di LBD aki mester responsabilisa nan mes na hefe di e cuerpo di LBD i tin cu funciona abase di codigo i reglanan cu ta regarda nan trabou. Schotte no a yega for di exterior riba dia di e acontecimento, Sr. Schotte no a haña bishita di ningun persona for di exterior i sr. Schotte no a pidi ningun miembro di LBD pa bai aeropuerto pa busca ningun maleta ni pe ni pa otro hende atravez di dje.

Loke cada ser humano hasi den su tempo liber o cualkier violacion di regla di trabou ta pa e persona su mes responsabilidad. Ku e reaccion aki, e partido ta spera, cu ta bon cla cu lider politico di MFK no por wordu pone responsabel i of wordu involucra den e acontecimento na aeropuerto caminda dos miembro di LBD tabata envolvi.