Casonan positivo nobo di COVID19 a subi te 69 awe

ORANJESTAD - Segun resumen di awe a registra un total di 69 caso nobo di Covid-19, di cual 60 ta residente y 9 no-residente. Esaki a crea confusion ya cu prome cu esey, riba pagina di prome minister di Aruba Evelyn Wever Croes el a pone cu e cantidad pa awe tabata 74 caso.  Pero despues e tambe a actualisa su post pa e cifra oficial di Crisis Team. Segun Crisis Team, e cifra 'oficial' ta 69.  E cantidad total di testnan ehecuta ayera na e diferente localidadnan entre otro laboratorio di hospital, laboratorionan priva y aeropuerto ta 735 test, ‘positivity rate' local riba dia di ayera ta 37%). Un total di 14 persona a recupera. 

ACTIVO

Activo tin awe 261 caso, cantidad di fayecido relaciona cu Covid-19 ta keda igual, 49.

HOSPITAL

Hospital ta informa cu tin un total di 6 persona interna di cual 2 ta den Cuido Intensivo y 4 riba unidad general di covid.

TOQUE DE QUEDA

Entrante awe dia 30 di december 2020 e medida di 'Toque de Queda' ta na vigor cuminsando 11or pm y ta termina 5or am di dia 31 di december.

MEDIDA DESAGRADABEL

E medida aki pa alguno ta desagradabel pero ta nesesario pa evita un brote di covid debi na e temporada festivo unda hopi hende tin e  custumber di aglomera y festeha e cambio di aña.

SENO FAMILIAR

Durante e orarionan di ' toque de queda' haci uzo di e oportunidad pa disfruta den seno familiar y gradici bo creador, es den cual bo ta deposita bo fe pa un aña mas di bida y pa bo famia y sernan stima cu por celebra e seramento di aña 2020 cu bo.